اكتب الابيات كلها في بدايتها السلام =وانتشي اروع حروفي لي تنطّق في كلامه
وجيت اببني شطر واحد صايغه بجد وتمام =لين ما صغت القصيده كل بيت لها استقامه
قلت فيها شوق قلبي وقلت فيها الالتزام =لعنبو شخص ٍ يكابر ماهو ندٍّ لالتزامه
سقت ابياتي بريح ٍ عابق الورد الخزام =صاحبه مني شعور ٍ يحمل الود ابتسامه
قلت وعند الله صادق خالق بروق الغمام =لي سجد له كل شخص ٍ في صلاته وفي قيامه
ماهو زيف ولا تصنّع او دخل طور الحرام =ولاهو مثل الشاعر الخقّاق صغّر من امامه
هو تأنّي هو تواضع هو تفاخر هو غرام =باعد ٍ بعد الثريّا (م) التسرّع والندامــه
حالتي قبله وبعده بين يوم وبين عام =غيّر الاوضاع فيني وزاد في قلبي هيامه
قبل كنت الفارس اللي ينعرف وقت الزحام =بعد حبه ما عرفت الخيل سرجه من لجامه
قبل في سود الليالي اهتني لذّة منـــام =بعد طيفه ما لفاني ساهر الليل وظلامه
قبل كنت انشد واغنّي .. عازف العود بهيام=بعد ما شفت الغزال اللي سلب لحني انتظامه
قبل كنت الي يحصّل من معاليها الوسام =بعدها شفت التنازل والسبب حضرة مقامه
ما اعتلا حاجب لعين ٍ خطّت الكحل ارتسام =ولا اعتلا من طير حرٍّ واستوى فوقه حمامه
قبل كنت اللي خياله شارد ٍ بد الانــــــام =بعد حبّه صار واقع في هوى قلبي زعامه
قبل كنت اللي بنا مجده وذراعه باعتصام =بعد زوله انهار مجدي واتّشتّت به حطامه
قبل كنت اللي مسك من هيبة القوّه زمام =بعد حبه زاد قوّه ما اهاب اقوى سهامه
قبل كنت اللي يغطّي الحرف مع لف اللثام =بعد صيته صار حرفي من عداد اهل النشامه
شوفوا حالي كيف كان وكيف صار وكيف دام=صار حالي غير حالي ساير لدرب الكرامه
وفي ختام الشعر صلى الله على خير الختام =النبي الطاهر محمد خير مبعوث وختامه
الإهداءات
18-May-2008, 12:03 PM
اول قصايد الخيال الشارد ~] قبل <> وبعد[ ~
