السلام عليكم


شحالكم




قصة حب حقيقة في راس الخيمه


عندي لكم قصه روعه ان شاالله تعجبكم
قريتها في احد منتديات وحبيت انقلها لكم
وطبعا هي واقعيه واستوت في راس الخيمه


في منطقة من مناطق راس الخيمه كانت شي عايلة معروفه ونقدر انقول من الراهيين يعني مستواهم المعيشي مرتفع.
كانت عندها بنتين الكبيره ريم 19 سنه والصغيره هنوف 10 سنين وولد كبير مانع متزوج عمره 24 سنه.
كانت الأم خقه تحب الموضه والمظاهر وولدها مانع من نفس الطينه وزوجته نوف بعد وماعندهم عيال مع ان صار لهم سنتين متزوجين.
أما ريم كانت وايد طيبه وكل أهلها يحبوونها .


في ربيع 2
ريم بغت تتشرا حق الكورس اليديد، كانت تدرس في التقنيه ادارة مكاتب السنه الثانيه لها.
نزلت الصاله وكان أبوها محمد وأمها مريم يالسين.
ريم: السلام عليكم
مريم،محمد: وعليكم السلام.
محمد: هلا هلا فحبيبتي بنتي الريم ..ها حبيبتي آمري محتايه شي؟
ريم ابتسمت، هيه من النوع الهادي والخجول، اطالعت ابوها بعينها العسليات وويها الطفولي: مايامر عليك عدو، أبا أتشرا حق الكورس اليديد ..ابا بيزاات.
مريم: هيه صح لازم تشرين، ليش ماتترين باجر نحن ترانا سايرين دبي وهناك أغراضهم أحلا وماركات.
ريم: لا عادي انا بتشرا من اهنا واذا عيبني شي في دبي بشتريه بعد.
محمد:معليه حبيبتي..كم تبغين؟
ريم: مممم مادري اللي تعطيني..ألفين درهم بتكفي.
مريم: شوو ألفين شو اييبون هيول هالأيام كل شي غالي..ياريم لازم ماتاخذين الا الشي الغالي والماركات..شو تبغبن يقولون بنت محمد شو لابسه رخيص ومادري شو.بو مانع عطها خمسة آلاف.
محمد: لحظه خل أشوف البوك ..ألف ألفين..مم و هااااي خمسه و600 بعد.
ريم: مشكوور أبويه..بخبر موسى يوديني.
محمد: ديري على بالج حبيبتي.
ريم: انشالله...سارت تتلبس وكانت ريم جميلة وماتحب تكشخ بس عالخفيف..والكل لما يشووفها يعرف انها راقيه من اسلوبها في اللبس والتصرفات.
عند الباب...ريم: داليا where is Mosa?tell him I wana go soq.
داليا:Ok Madam.
موسى ياه لريم: ماما هذا سيارة في تاير خربان..سوي انتزار ساعه .
ريم:شووو ساعه وايد..ماتروم اتخلص في نص ساعه عالأقل؟
موسى:انشالله ماما يسوي شغل جلدي انشالله خلاص.
ريم: اوكى بسرعه مافيني يستوي المغرب بعدين مشكله عند شارع كويتي كله في شباب مب زين يلا خلص.


ريم تتمشى جدا حديقتهم وعند الحوض يلست وطيحت الوقايه ويالسه اتغني وينهم أحباب قلبي..واطالعت ساعتها الجفنشي كانت 4:30 وفجأه سمعت صوت واحد: السلام عليكم .
ريم رفعت راسها بسرعه وشافت ولد خالها حمدان: وعليكم السلام وغطت شعرها بسرعه.
ريم ما اداني حمدان لانه وايد فرييه وعنده ربيعات ولانه خقاق وكل سيارة تنزل عنده.
حمدان:شحالج وشحال عمتيه؟
ريم:بخير..عمتك داخل...ووقفت ومشت عنه كم خطوه بعيد.
حمدان بصوت خفيف بس ينسمع: عفانا الله لهدرجه أنا أزيغ كل ما يشوفوني يشردون.
ريم اطالعته بطرف عينها وسارت تطالع موسى شو صار به.
ريم: شوها موسى بعدك ما خلصت.؟
موسى:لا ماما هذا لازم يودي كراج ما يستوي.
ريم: بس هذي رمستكم كله مافي يستوي ما يستوي...كانت ريم محرجه لانها كل ماتشوف ولد خالها حمدان تغيض.
ريم: أوكى خلاص انا مب سايره اليوم..وسارت دشت الصاله وأمها وحمدان داخل.
مريم: ريم بلاج أميه ماسرتي ببعدج؟
ريم: موسى يقول شي تاير مادري بلاه ..مب سايره اليوم خلاص.
حمدان راز بويهه: أفااا..أفاا عليج ريما أنا موجود بوديج اذا بغيتي.
ريم منصدمه من الرمسه وتقول في خاطرها: صدق ما يستحي اونه بيوديني ..ماحصل غيري بيسير مع هالأشكال..
وهيه لايعه جبدها : يلا اسموحولي بسير حجرتيه..وصعدت بسرعه فوق.
مريم: فديتك حمدان عمووه ريم الظاهر تستحي منك.
حمدان: هيه الظاهر جيه..أنا أوشوف كل ما تشوفني تشرد..
ريم في حجرتها: أفف شو ها كل ما أخطط أسوي شي ينقلب ظيج..وهذا حمدانو كملها بعد..ماعرف أمايه شو عايبنها فيه....خل أدش النت وأشيت ويا الربع في المسنجر أحسنلي.
شغلت النت ودشت المسنجر وشافت ربيعتها عنود أون لاين.
عنود(دلووعة راك):هلاا والله بريموو..وينج يالقاطعه؟
ريم(دنيا من الوله):انتي اللي وين يالخيله؟ شحالج وشحال الغاليين ؟
..أونهم زعلانين ويالسه اراضيهمدلوعة راك: لووول والله الحمدلله .
ريم: خخخخخخخ والله انكم ماعندكم سالفة أونكم تحبون .
دلوعة راك: هييه يا ريمو بعدج ماتعرفين الحب..انشالله اتحبين واتحسين فيني..وشو أحس.
دنيا من الوله: لا لا لا مابا بعيد الشر..آآآآي يلا نشي يالس يأذن المغرب..صلي بدل هالخرابيط.
دلوعة راك: خخخ انشالله..يلا سي يو


الساعه 9بالليل
في الصاله ريم وهنوف يطالعون تلفزيون..مريم نازله وعلى آخر كشختها
مريم: أميه ريم..أنا سايره خطبة بنت اربيعتي ام عبدالله..ديري بالج من هنوف ولا تخلينها تسهر..وإذا رقدت طلي عليها مب تيلسين عالكمبيوتر وتنسين عمرج.
ريم: انشالله أميه بس لا تتأخرين ترا بخبر أبويه عليج.
مريم: ههه لا والله..يلا يلا شوفي التلفزيون احسن...وطلعت
هنوف: ريييم حطي ديزني..مب كله التلزيون حقج انتي.
ريم: بععععد ياهال ويتشرطون..انشالله عمتيه..يودي الريموت أنا سايره للكمبيوتر الصديق الوفي هههه
ريم شغلت الكمبيوتر..دشت المسنجر..وشويه بتصيح لما شافت محد أون لاين عندها.
ريم: شوهالحاله شو هالربع..مامنهم فايده..خل أطرش مسج حق عنودو الخبله خل اتدش..
ريم طرشت مسج..تتريا عنود اتدش..وتطالع المسنجر كل شوي..ومحد دش...بعد عشر دقايق وصلها مسج: ماروم أدش النت أنا مب في البيت.
ريم: أفف شو هالبنت كله برع البيت ماتقر..خل أشوفلي أي شغله ..ممم بفتح لي ايميل يديد.
يتبع

وفتحت ريم ايميل باسم دمعة حزن.
ريم: خل اخبر عنودو اتسويلي ادد على الايميل اليديد...وطرشت ريم مسج تخبر عنود بهذا الايميل.
وبعد ربع ساعه يت عنود أون لاين.
دمعة حزن: عنودوو اخيرا دشيتي والله ملل ماعندي حد أون لاين.
دلوعة راك:هلا ريم..شو ملانه؟ مبروك عالايميل اليديد.
دمعة حزن: هههه الله يبارك فيج عقبالج لوول.
دلوعة راك: هههههه أكيد الحينه اللسته مالتج فاظيه..تبغين ايميلات؟
دمعة حزن: هيه والله..عطيني..بس ابا حد دوم يدش وسوالف.
دلوعة راك: أوكى هذا ايميل واحد حبوووب وسوالف ودووم عالمسنجر حزين@hotmail.com
دمعة حزن: عنودو ويا ويهج تعرفين اني ما أظيف أولاد.
دلوعة راك:لا والله هذا غير حبووب وطيب وماعنده خرابيط.
دمعة حزن: لا والله..الشباب كلهم نفس الشي يبون البنت ترمسهم بالتليفوون.
دلوعة راك: ههههههههههههه لووووول.
دمعة حزن: والله وبعد مستانسه انتي.
دلوعة راك:أوكى برايج انتي الخسراانه والله هو سوالف وطيب وأنا أظمنه لج..أنا أعرف الشباب وهذا مؤدب ومايخصه في الخرابيط.
دمعة حزن: ممم مادري بشوف.
دلوعة راك: أوكى يلا أنا بخليج
دمعة حزن: لا والله وين سايره توج داشه.؟؟
دلوعة راك: بااااي
ريم: طااع هذي والله انها ما تستحي داشه تعطيني ايميل واحد وظهرت حتى بعدني ماقلت لها باي.
بعد ساعه..ريم: شو هالملل...خل أسير أشوف هنوف عن أمي تهزبني.
هنوف راقده في الصاله..ريم: هنووف..هنووفوو يلا نشي سيري حجرتج..لحوول راقده هذي..خل أشيلها هاي ظعيفه سلق عادي...وودتها حجرتها وردت ريم حجرتها.
ريم: شو هالملل...ممم...خل أظيف هذا الانسان واسولف وياه عقب اسويله بلوك ودليت هههه.
ريم: أوبس هايوه أون لاين.
حزين: مرحبا ..هلا والله
دمعة حزن: هلا..اشحالك؟
حزين: بخير وسهاله..اشحالج انتي؟...انتي منو؟
دمعة حزن: بخير..أنا ربيعة عنود..هيه عطتني ايميلك.
حزين: منو عنود....هيييه دلوعة راك عرفتها..شحالها؟ وينها هيه محد عندي اون لاين؟
دمعة حزن: هيه بخير..محد دشت وطلعت قبل شويه.
حزين: أيواا..شو بعد أخبارج؟
دمعة حزن: بخير..ترا أقولك أنا ظفتك بس ابغي أسولف مب عسب شي..فلا تحاول ترقم ولا تقردن أعرف سوالفكم أنا.
حزين: هههههههههههههههه..والله انج سوالف..لا تخافين مب مرقمنج.
دمعة حزن: ممم..شو بعد؟
حزين: ماشي والله..انتي تدرسين؟
دمعة حزن: هيه في التقنيه ثاني سنه ادرس ادارة مكاتب..
حزين: زين والله..انا بعد أدرس فس جامعة العين..انشالله خريج هالسنه الكورس الياي..ادرس هندسه كهربائية...ترا أنا من راس الخيمه.
دمعة حزن: هييه أنا بعد..فديت راك ,اهلها..
تموا يسولفوون لين الساعه 12.....سمعت صوت أمها برع
دمعة حزن: أقوول أنا بطلع لأان أميه وصلت وماباها اتشوفني يالسه عالكمبيوتر لين هالحزه.
حزين: أوكى يلا تصبحين على خير.
دمعة حزن أوف لاين.

في بيت عنود
عنود توها يايه..كانت في الحفله هيه بعد..
عنود دشت حجرتها: فهووود..انته شو اتسوي..زخيييتك مع منو على المسنجر؟ بسك تقرديم مب كافي البنات اللي ترمسهم صدق.
فهد:شو تبين ..انتي شلج اشيت مع منو ولا أرمس منو..منو الحينه الأكبر..تتحرين عمرج أميه ولا أبويه ها يالعيوز؟
عنود: أوهوو بس انزين انته ما تنعطى ويه..يلا نش عن الكمبيوتر دوري.
فهد: انشالله أمييه.
عنود: فهووود ماشفت موبايلي كنت ناستنه عالشبريه الظاهر.
فهد: هيه هاايوه عندي.
عنود: حد اتصل بي ولا طرش مسج؟
فهد: هيه وحده اتصلت وسولفت وياها وظحكنا وسولفنا حتى اتصلت بها وخلصت رصيدج.
عنود: لا والله وانته منو سمحلك اترد على اربيعاتي وترمسهم؟
فهد: ههههههه من زين ربيعاتج لا تخافين اسولف وياج بس وحده طرشت مسج.
عنود: اشووف منو هاي...هييه هاي ريموو اربيعتي.
فهد: ريم..؟ منو هاي البنت.
عنود : هاي بنت العريف محمد جان عرفه اللي ساكن في (...) ويايه في التقنيه هيه.
فهد: هيه هيه عرفته..انزين خبريها اتظيفني عالمسنجر عندها.
عنود:ههههههه تحلم انته لانها ماتظيف شباب...ويلا يلا برع برقد الحينه..محتل حجرتيه من الصبح.
فهد: من زينة حجرتج اللي يقول سويسرا محتلنها اونه..يلاا ارقدي سالعيوز رقدت عليج طووفه ههههه
عنود: متى يسير الجامعه نفتك من حشرته.

ريم عل شبريتها بترقد: والله صدق حزين مؤدب وأنا اتحرا كل الشباب شارات بعض..أوبس نسيت أسأله عن اسمه..خلاص باجر بسأله.
فهد على شبريته بيرقد ويفكر بريم هو بعد: والله هالبنت عجيبه أول مرة أسولف ويا وحده شاراتها..حتى حسيت براحه لما سولفت وياها..في كل شي صادقه ولا تعرف تجذب اللي في قلبها على لسانها..حليلها والله لو هيه وحده من اللي أرمسهم لو كشخه بس ماشي حظ..كل البنات اللي أرمسهم مصلحجيين..يلا يمكن أروم أييب راسها.

الصبح يوم الخميس

ريم نزلت تتريق
ريم:صباح الخير ماما
مريم: صباح النور والسرور..هلا في حبيبتي ريما.
ريم: شو هالريوق مالي نفس..أبا كورن فليكس ماتعرفون إني أحبه ولازم آكله كليوم.
مريم:ريموو بسج عاده كله كورن فليكس شو باجر بتعرسين بتريقين ريلج كورن فليكس؟!!
ريم: ههههه هيه ليش لا..لازم يشاركني في كلشي ويتعود على طبعي..ولا لازم أغير ذوقي على حسب العريس؟
مريم: عاد حمدان ولد خالج مايحب هاللي انتي تاكلينه..يحب شي راقي مثلا ساندويشات جبن ومرتديلا.
ريم: لا والله وأنا شولي تخبريني؟
مريم: ليش هو مب خطيبج من انتوا صغار ونحن نقول هالرمسه.
ريم: لحول لازم اتظيجين خلقي من الصبح خلاص مابا أتريق بسير حجرتي.
ريم: هالبيت كله يظيجون علواحد..خل أدش النت أحسنلي.
دشت وحصلت عنود
دلوعة راك: هلا هلا بالريم.
دمعة حزن: هلا والله اشحاالج؟
دلوعة راك: والله تمام اشحالج انتي؟ من صباح الله خير داشه..
دمعة حزن: لا والله وانتي عيل شو اتسوين يالخبله عالمسنجر هالحزه؟
دلوعة راك: هههههه والله ريمو انا من البارحه واعيه مب راقده طول الليل يالسه عالنت ويالقلب
دمعة حزن: ههههههه مشكله اللي يحبون الله لا يبلينا.
دلوعة راك: رييم أنا بظهر أخويه يبا النت يلا باي عن يظربني هههه باي.
دمعة حزن: أوهوو أوكى بااي.
ريم: لازم هذا أخوها يبا النت الحينه لما أبا أسولف وياهاا.
بعد شويه حزين أون لاين
دمعة حزن: هلا والله حزين..اشحالك؟
حزين: أهليين دمعة..صباح الخير اشحالج؟
دمعة حزن: والله ماشي الحال..متظايجه اشوي
حزين: أفا ليش منو مزعل الغاليين؟
دمعة حزن: منو غاليين؟ هااا؟؟ لا تغلط خلنا حلوين ولا بتشوف ويهي الثاني
حزبن: هههههههههههه أوكى أوكى خلاص شو السالفه منو مظيج بج؟
دمعة حزن: والله شو أقولك..بس لاتخبر حد
حزين: أخبر منو يعني أنا أعرفج ولاأعرف حد يعرفج هههههه
دمعة حزن: ههههههههه هيه والله صدق...تعال انته شو اسمك؟
حزين: مممم..بعدين بخبرج مب الحينه
دمعة حزن: ليش؟؟
حزين: بس..شو رايج انتم جذا مانخبر بعض بأسامينا الحقيقيه.
دمعة حزن: مم أوكى برايك.
حزين: المهم شو السالفه خبريني بلاج؟
دمعة حزن:.....خبرته عن حمدان وكيف ان أنها تبغيها حقه وهيه ماتدانيه..لانه كذا وكذا..
حزين: أهاا
دمعة حزن: والله أحس بظيج وحتى ماتريقت أول ما يابت أميه هالسيره.
حزين: أفاا....ممم تبغين الظيج يخوز؟
دمعة حزن: مابيخوز الا لما أميه تشل من راسها هالفكره واتغير رايها.
حزين: أوكى انتي جربي ..وصدق بيخوز الظيج وبتستانسين..اتصلي على هالرقم#######
دمعة حزن: اييه انته شو اتقوول
حزين: والله دمعه مابتخسرين شي بس جربي..بس أحب أساعدج والله لا تفهمين غلط.
دمعة حزن: والله انك ماتستحي..تتحراني يالسه العب ولا أمزح وياك..يلا باي
فهد: شاااات..والله انها عنيده

الساعه 11 الظهر

ريم: أحس بيووع..أبا آكل ..بسير أشوف لي شي آكله.
مريم في الصاله
ريم: أمييي..يوعانه أنا.
مريم: والله يوم كان الأكل جدامج نشيتي وماكلتي الحينه اتصيحين يوعانه.
ريم: أمييه أبا آكل والله بطني يعورني من اليوع.
مريم: ماشي يلا..بعد نص ساعه بنتحرك بنسير دبي وبنتغدى في البوم اتحملي اشويه.
ريم: لا والله الحين لازم أسير اتلبس عالسريع..ليش ماخبرتوني قبل.
مريم: والله انتي كله في حجرتج مانشوفج يلا سيري بسرعه اتلبسي لأن حمدان بيوصل بعد شويه.
ريم: شوووه حمداان؟؟ ليش؟؟
مريم: ترا هو بيودينا دبي.
ريم: نعم...ووين أبويه عيل؟
مريم: عنده شغل اتصلوا به الدوام وسار وحتى ماتريق ولا شي..وانا قلت مابنخرب البروجرام وخبرت حمدان يودينا.
ريم: أوكى خلاص حق شو انسير دام ابويه محد؟؟
مريم:لالالا أنا استسمحت من اربيعتيه كانت عازمتني عالغدا عسب قلت لها سايره دبي..يلا عن الرمسه الزايده وسيري اتلبسي.
ريم مبوزه: انشالله.
صعدت ريم واتحس انها بتنفجر من الغيض واتلبست بسرعه وماتزينت وايد..مالها خلق الدنيا ونزلت الصاله.
حمدان: هاا ريما خلصتي اخيرا ياسندريلا.
ريم تطالعه مالها نفس ووقفت عدال أمها.
مريم: يلا حمدان توكلنا.

في بيت عنود

عنود وفهد يشوفون تلفزيون وأبو فهد وأم فهد.
عنود: أقولكم مب جنه ملل..من الصبح نحن نطالع في هالتلفزيون.
محد معبرنها..
سارت يلست عند فهد:فهد قوم طلعني شويه والله بنفجر من الملل.
فهد: خوزي عني لاا.
عنود: أوهوو قوم عاد..يلاا من متى مب ظاهره من البيت.
فهد: وين بتسيرين في راس الخيمه كلها شارعين..إذا تبين اوديج البحر بوديج

عنود: لا والله فهوود يلاا أي مكان نتمشى في السياره عالأقل.
بو فهد: حشرتوونا انتوا بلاكم؟ شوهالحشره؟
عنود: أبويه ملانه ابا اظهر وفهود مب طايع يظهرني.
بوفهد: وين بتسيرين في هذا الظهر؟
عنود: ليش مانسير دبي من سنه مب سايرين هناك.
بوفهد: أنا مب ساير وياكم اليوم أنا مشتهي سمج هامور عالغدا وأمج مزهبتنه للغدا.
عنود: مالي خص أبا أسير ....وبوزت
أم فهد: فهوود جييه ماتظهر عنود ماعندكم شغله ولا مشغله وطول الاجازه حليلها عنود ماسارت مكان قوم بارك الله فيك طلعها شوي.
فهد: لحوول بلشتنا هذي عنودو.
بوفهد: يلا عن الحشره فكنا طلعها يلا قم.
فهد: انشالله..وهو يطالع عنود وعيونه كلها حقد شكله يتحلف لهاا.
عنود مستانسه وبطير من الفرحه.

في سيارة حمدان
ريم يالسه ورا حمدان وطول الدرب وهو يرمس عن نفسه وعن شو بيسوي في المستقبل وعن مكانته وعزم هذا واتوسط حق هذاك وناس مدحوه..وريم شويه تبا تزغطه وودها تفتح باب السياره وتنزل..
وهو كل شويه يلف المنظره اللي فوق راسه صوبها قصده يخليها تشوفه وهي مب معبرتنه..وحط أغاني أجنبيه وأم ريم مستانسه تتحرا حمدان يفهم شو تقول الاغنيه..وريم ميوده عمرها طول الدرب وتسولف ويا هنوف وتبي الوقت يمر بسرعه.

ووصلوا المطعم..وحجزوا طاوله ويلست ريم ويلس حمدان على الكرسي اللي مجابل ريم..وسألهم شو يبون وهو يطالع ريم.
ريم تطالع البحر ومب معبره
مريم: أنا بطلب لهاا..وخذت اللسته وطلبت ويلسوا يتريوون الطلبيه.
بعد اشويه..عنود دشت المطعم وريم شافتها..ريم وقفت وقالت :أمي بسير شويه وبرد.
ريم: عنوودوو انتي شسوين اهنا؟
عنود: ريموو انتي اهنا بعد؟
ريم: زين يوم ييتي والله مظايجه..بس غريبه يايه دبي شو يايبنج ومع منو يايه؟
عنوود: هههه هيه والله هذا فهد أخويه يايبني.
ريم: أها وينه عيل؟
عنود: الحينه بيي..شو رايج نيلس رواحنا ونتغدا.
ريم: أوكى لحظه بخبر أمايه..وسارت عند طاولتهم
ريم: أميه أربيعتيه عنود شفتها في المطعم ..عادي أسير أتغدا وياها.
حمدان: وليش هيه ماتيي تتغدا ويانا ؟
ريم: والله اربيعتيه تستحي تتغدا مع واحد غريب..ها أميه عادي؟
مريم: هيه أميه عادي ..وخبريها الغدا على حسابنا.
ريم: ثاانكس مام.
عنود: ريموو منو هذا الولد الغاوي اللي وياكم أخوج؟
ريم: لالا بعيد الشر هذا حمدان اللي أخبرج عنه أونه زوج المستقبل.
عنود: ليش خطبج؟
ريم: لاااا بس أميه محطيه عليه الآمال والأحلام أونه محد ياخذج غيره.
فهد دش المطعم..ويالس يتجرب من ريم وعنود
عنود: فهد تعال هذي اربيعتي ريم.
فهد يطالعها وعيونه عليها من بعيد لين ماوصل: السلام عليكم
ريم: وعليكم السلام.
فهد مب مصدق ان هذي ريم: اشحالج؟
ريم: الحمدلله بخير.
عنود: فهد ترا أنا وريم بنيلس نتغدا رواحنا سير شوفلك مكان ايلس فيه.
فهد فاتح عيونه ويحس ان محد في المطعم غير ريم..ويقول في نفسه: هذي ريم..مشالله عليها قمر ماتوقعتها جذا.
فهد: انزين مع منو يايه ريم؟خبرتي هلج انج بتيلسين ويا اختي؟
ريم: هيه هذيج أمي وولد خالي يالسين هناك..خبرتهم قالوا عادي.
فهد يطالع الطاوله وشاف حمدان وقال في نفسه: هذا أكيد حمدان اللي خبرتني عنه ولد خالها اللي ماتدانيه.
فهد: أوكى خلاص يلا عن اذنكم..وروح

وبعد الغدا كل واحد ركب سيارته وروحوا.
في السياره ريم كانت تفكر في حزين..وحست انها تبغي ترمس حد..وطول الدرب وهيه تفكر فيه وفي طلبه انه تتصل به.

لما وصلوا البيت ريم صعدت حجرتها وأول شي سوته دشت المسنجر وحصلت بطيق واايد أسف إعتذار من حزين ويطلب منها ان تسامحه على اللي سواه وانه عطاها الرقم قبل لا يستأذن
وبعد شويه دش حزين المسنجر
وحست ريم ان قلبه قام يدق بسرعه..وفتحت البوكس مال ايميل حزين وتكت تطالعه تتريااه يكتب شي..هو تم ساكت وهيه بعد
ريم قامت وكتبت: وعليكم السلام
حزين: هلا اشحالج دمعه..دمعه ترا أنا آسف على اللي سويته..ليكون بعدج زعلانه
دمعة حزن: ممم..ابصراحه انا كنت زعلانه بس الحينه لا.
حزين: الحمدلله..اشحالج وشخبارج.
دمعة حزن: والله تمام ..توني راده من دبي وشفت عنود هناك بعد.
حزين: أهاا زين والله شحالها هيه.؟
دمعة حزن: والله زينه..وايد استانست وياها..زين اني شفتها لاني كنت وايد متظايجه.
حزين: ليش؟؟
دمعة حزن: لأن ولد خالي هو اللي مودنا واتخيل حالتي وأنا روحي مادانيه
حزين: أهاا..انزين دمعه ليش انتي كارهتنه؟ يمكن هو مايستاهل كل هذا..يمكن هو انسان أوكى..انتي ماعاشرتيه ولاعرفتيه زين بعدج.
دمعة حزن: لااا أنا أعرفه وكافي اللي شفته منه الين الحينه..إذا هذا كله ومن بعيد بس أعرفه كيف لما أشوف المستخبي أكيد بيظهر أخس عن جذا بعد.
حزين: مادري شو أقولج..بس لازم اتشوفين راي اللي حواليج بعد مب تحكمين عليه من نظرتج له بس.
دمعة حزن: أميه تحبه وايد وأبويه عادي عنده يشوف مستقبله بيستوي تراه طيار وأخويه دوم وياه علاقة اوكى يعني معاه.
حزين: شفتي كيف يعني انتي بس تشوفينه من زايه وحده..ولابد انج تشوفينه من كل النواحي ومب تحطمين عليه بس من أسلوبه وكل واحد عقب الزواج يتغير يادمعه ويحس بالمسؤوليه أكثر.
دمعة حزن: لحوول انته بعد في صفه..مشكور عالنصايح أنا بطلع باااي.
حزين: وين سايره؟
دمعة حزن : أنا قلت الحينه انته بتخفف عني طلعت تزيدني هم.
حزين:دمعة أنا أحاول أساعدج ويمكن باجر هالانسان يتقدم لج شو بتسويين عقب..يمكن يكون في صالحج انج توافقين عليه..فكري يادمعه عدل.
دمعه حزن: أوكى انشالله يالله فمان الله حزين سي يو.

في بيت عنود

فهد بند الكمبيوتر وطلع من الحجره وهو متظايج وعنود كانت يالسه في الصاله.
عنود: فهوود وين ساير؟
فهد: بطلع شويه.
عنود: أوكى أبا شوارما وانته راد ييبلي.
فهد: سيري لااا.....وظهر وهو مبوز
عنود: هذا شو بلاه معصب.
فهد في سيارته يسوق ومايعرف وين يسير..ومحطي اغنية راشد الماجد يابعد هالدنيا ليه
http://songs.6arab.com/rashid..ya-b...denyah-laih.ram
ويالس يفكر في كل شي صار .وكيف تعرف على ريم..وشافها وهيه ماتعرف انه هو حزين اللي ترمسه فس المسنجر أخو ربيعتها..وكيف انها عيبته..باخلاقها وأدبهاا
كان في خاطره يساعدها ويكلمها..ويود موبايلها يبا يتصل في رقم ريم اللي حفظه من موبايل عنود..وكل شوي يكتب الرقم ويمسحه سكتبه ويمسحه..وعقب وصل عند البحر..وهد الموبايل ويلس يطالع البحر..

فهد: أنا شو بلاني ليش أفكر بها وايد؟ وأنا الا عارفنها من كم يوم..بس ماعرف شو اللي يجذبني لهاا..مشالله أخلاق وجمال..
فجأه الموبايل يدق...وشاف رقم غريب..حس إنا ريم..ويقول في خاطره : جان زين هيه..وكان متفائل انها ريم....رد : ألوو
بنت: مرحبااا
فهد: مرحبتين...منو معايه؟
بنت: انته فهد؟
فهد: هيه نعم منو انتي؟
بنت: أنا أماني شو نسيت صوتي؟
فهد: أماني؟؟ أي أماني؟؟.....هييييييه عرفتج...نعم بغيتي شي؟بنت: بسم الله بغيت أسلم عليك بس.
فهد: أوكى يلله أنا مشغول الحينه
بنت: في شو مشغول؟
فهد: بس مشغوول بعد شو عندج مانع؟
بنت: انزين اتصل بي لما تفضى على رقمي هذا
فهد: انزين لما يبيض الديج بتصل بج ..يلا يلا باي
صكر عنهاا
وقام يطالع الموبايل وايطالع البحر مره ثانيه..ويقول: أنا شو يالس أسوي؟ شو صار بي ..حق شو كل هذا..أول مر أرمس وحده بهالأسلوب..,انا اللي ماصدق بنت تتصل بي..معقول كل هذا بسبب ريم؟
رد البيت فهد

عنود: فهود..فهوود
فهد: هاااا
عنود: شوبلاك ماتسمع؟ وين الشوارما؟
فهد: أي شورما انتي بعد..خوزي عني
فهد دش النت وحصل ريم أون لاين..الساعه 10 مسااءا

حزين: السلاام
دمعة حزن: وعليكم السلام
حزين:......
دمعة حزن: حزين بلاك ساكت؟
حزين: لا ماشي
دمعة حزن: حزين..أنا آسفه لاني كنت أرمسك فهذاك الاسلوب والله غصب عني..انته شوذنبك أطلع غيضي عليك..انته كنت تبا تساعندي وتخفف عني.
حزين: لااا دمعووه عادي والله انتي شارات اختي وما أزعل منج..وأنا مستانس لأني شفتج الحين
دمعة حزن: أنا بعد
حزين: هذي اهداء لج
http://songs.6arab.com/3abdelmajeed..men-za33alak.ram

دمعة: ثانكس
حزين: دمعة أنا أول واحد ترمسينه عالمسنجر صح؟
دمعة حزن: هيه
حزين: شو رايج فيني؟؟ندمانه لأنج ظفتيني؟
دمعه حزن: لااا..هذا أصلا كان قراري..ومب نادمه بلعكس علأقل حصلت حد ينصحني ويسمع مشاكلي.
حزين: ماتخافيين اني ألعب وياج؟؟أو إني أقردنج ؟
دمعة حزن: ليش انته يالس تلعب ويايه ولا تبا شي مني؟
حزين: ابصرااحه..انتي الوحيده اللي أحس اني أعاملها باحترام ولا أفكر اني أذيج لانج ياريم تستاهلين كل خير.
ريم: حزييييين.....شعرفك باسمي؟؟
حزين: هاا..لا ماعرفه.
دمعة حزن: انته توك كتبت اسمي..
حزين: هييه والله..لول...مم مادري تخمين.
دمعة حزن: حزيين..انته تعرفني؟
حزين:....
دمعة حزن: منو انته؟؟ قولي بلييز أبا أعرف كيف عرفت اسمي..أنا أعرفك؟
حزين: ....ريم..بقولج شي بس لا تزعلين بليز..كم مره إلحين أنا مزعلنج.
دمعة حزن: والله مابزعل بس قولي.
حزين: أنا..أخو عنود...فهد.
دمعة حزن: نعم...!! وكيف هيه عطتني إيميلك وماقالت إنه مال أخويه قالت إيميل واحد.حزين: لااا ..أنا كنت داش بايميل عنود..هيه كانت ناسيه موبايلها وأنا شفت المسج وايميلج وسوييت لج اد..و أنا عطيتج إيميلي..
دمعة حزن: كيف دشيت على إيميل عنود؟؟ إنته تعرف الباس وورد مالها؟
حزين: لااا هاي عنود غبيه مسويه الباس وورد رقمها خخخخخ
دمعة حزن: ههههههه أها
حزين: ليكون زعلتي؟
دمعة حزن: لالا عادي حصل خير.
حزين: تعرفين ريم..اليوم لما شفتج انصدمت..مشالله عليج جمال وأخلاق.
دمعة حزن: ههه..ثانكس..ممم عنود تعرف انك ظايفني؟
حزين:لاا..هيه روحها قالت تحلم ترمسك هيه ماتظيف شباب.
دمعة حزن: هييه ماتعرف إني إختربت إلحينه لوول
حزين: لااا لاتقولين هالرمسه إنتي ماعليج كلام أدب وأخلاق
دمعة حزن:^_^
ويوم بعد يوم صاروا قريبين من بعض أكثر وأكثر..ويتمون بالساعات عالمسنجر لين الفير..وفهد حس بعمره يتغير وصار مايفوت صلاته وودر الخرابيط والبنات.

أول يوم دوام في التقنيه ((السبت))
بيت ريم

ريم: أمييه ماشفتي الجوتي اللي شريته من دبي؟
مريم: ريم إنتي دوم ماتعرفين وين تحطين أغراضج
ريم: أنا خبرت داليو تشل الأغراض ومادري وين حطتهم.
مريم: لحظه بسير أسألها.
ريم تاكل ريوقها كورن فليكس طبعا.
مريم: إندوج بعد قولي لبسوني ياه والله..أخبرج ترا الدريول ماياا اليوم شكله تعبان
ريم لا والله عيل منو بيوديني التقنيه إلحينه؟
مريم: خلاص مب لازم إتسيرين أول يوم مابيحاسبوونكم
ريم: لا والله عسب يقولون الأساتذه من أولها مهمل