السلام عليكم ورحمة الله وبركاته

(قلبي المشتاق متولع يباك يا وله يا شوق قلبي والعيون)

هذي هي أول قصة لي وأتمنى بالفعل إنها تنال على اعجابكم
وفي البداية راح أعرفكم على الشخصيات

الشخصيات

عائلة أبو ناصر – دبي

أبو ناصر .. عمره 39سنة محامي وعنده شركة محاماة
وفاتح له عدة فروع في مختلف دول الخليج
يحب أولاده وعمره ما قصر عليهم بشي
كريم وطيب وله السمعة الطيبة بين الناس
أم ناصر .. عمرها 37سنة ربة منزل مثل ما يقولون
تحب عيالها واااايد حنونة كأي أم بس في نفس الوقت عصبية لأبعد الحدود
ناصر .. عمره 23سنة يشتغل محامي مثل أبوه بعد ما درس القانون في الخارج
حلو ووسيم ودوووم مطفر بأخته شوق
شهد .. عمرها 19 سنة تدرس في الكلية سنة ثانية إدارة أعمال
طيبة وايد وعلى نياتها وكل إخوانها يحبونها
جميلة بشرتها فيها نوع من السمارة معطتنها رونق خاص
شوق .. عمرها 17سنة ثانوية عامة أدبي .. جميلة وبشرتها بيضاء .. عيونها ناعسة ولونها بني فاتح .. ماخذة من طيبة أبوها ونفس الوقت من عصبية أمها حساسة لأبعد الحدود ورومانسية وهي آخر العنقود من جيه هي دلوعة أبوها على عكس شهد اللي هي دلوعة أمها

عائلة أبو راشد - دبي

أبو راشد .. عمره 45سنة اخو أبو ناصر رجل أعمال وأغلب وقته سفر في سفر يعني وجوده في البيت نادر وقليل.. وهالشي سبب ثغره بينه وبين عياله .. هو يظن بما إنه ملبي كل مطالبهم بالفلوس فأكيد مب ناقصهم شي
أم راشد .. عمرها 40 سنة تحب عيالها وتخاف عليهم من نسمة الهواء
راشد .. عمره 23سنة من عمر ناصر ولد عمته.. يشتغل في شركة أبوه .. حلو بس مب شرات ناصر في حلاته .. وفي بعض الأوقات يصير أناني بالرغم من إنه طيب وايد وكل بنت تتمناه .. إلا اللي هو تمناها
محمد .. عمره 19 سنة يدرس في الجامعة تخصص إدارة أعمال على أساس بعد ما يخلص يشتغل ويا أبوه
سارة .. عمرها 22 سنة حلوة وحبوبة وتدخل القلب بسرعة بعد ما خلصت دراسة يلست في البيت وما حبت إنها تتوظف..!!
الريم .. عمرها 17 سنة ثانوية عامة أدبي ويا شوق وهن أكثر من ربع مب بس بنات عم وأغلب الوقت ويا بعض

عائلة أبو مايد - دبي

أبو مايد .. عمره 38 سنة هو أخو أبو ناصر وأبو راشد يملك شركة استيراد وتصدير .. طيب وبالرغم من انشغاله إلا إنه دوم ويا عياله وعمره ما قصر عليهم بشي
أم مايد .. عمرها 34سنة طيبة وايد وحنونة ع عيالها لدرجة إنهم يحبونها وايد
مايد .. عمره 20سنة يشتغل ويا أبوه في الشركة وسيم وحلو وخقاق وايد دومه متكشخ
فواغي .. عمرها 17سنة ثانوية عامة أدبي جميلة وفيها شبه من مايد طيبة وايد وتنحب بسرعة .. وابتسامتها ما تفارقها


عائلة أبو حمد - دبي

أبو حمد .. عمره 40سنة هو وأبو ناصر أصدقاء ودوم مع بعض وهو يشتغل في شركة المحاماة
أم حمد .. عمرها 35سنة هي صديقة أم ناصر بحكم إنهم جيران وبيوتهم عدال بعض طيبة وايد وتحب عيالها
حمد .. عمره 21سنة يشتغل في الاتصالات وسيم وحلو لدرجة إن البنات ما يشيلون عيونهن من عليه
مريم .. عمرها 19سنة من سن شهد وهي رفيجتها لأنهم يدرسون نفس التخصص وفي نفس الكلية حلوة وألف من يتمناها هذا غير إنها وااايد طيبة بس هاااااااادية واااااايد
حور .. عمرها 17سنة ثانوية عامة أدبي ويا شوق بنفس الصف ورفيجتها الروح بالروح وما تخبي عليها أي شي ودوم مطيحة في بيتهم



عائلة أبو سعيد - العين

أبو سعيد .. عمره 38سنة يملك شركة مقاولات يحب عياله سعيد وروضة واااايد لأن هم نتاج زواجه من أم سعيد اللي طلقها من لما كان عمر روضة 6سنوات
أم سعيد .. عمرها 35سنة طيبة وحنونة واايد وتحب عيالها لدرجة كبيرة بعد ما تطلقت من أبو سعيد ظلت تربي في عيالها لحد ما كبروا وبعدها تزوجت من واحد من دبي وألحين عايشة وياه
سعيد .. عمره 20سنة يدرس في الكلية وأحيانا يروح عند أبوه الشركة يساعده.. حلو وااايد وهو الوحيد اللي قدر يملك قلب شوق .. مغرور واايد وغروره يزيده روعه وحلاة كان يعيش هو واخته ويا أمه بس بعد ما تزوجت خذاهم أبوهم ويعيشوا معه احين لكنهم بين فترة وفترة يروحوا يزورون أمهم وبما إن بيت يدته أم امه قريب من بيتهم فهم دوم في بيت يدتهم
روضة .. عمرها 17سنة ثانوية عامة أدبي فيها شبه من سعيد وهي جميلة وعيونها واسعة وبشرتها بيضاء



هذا بـ اختصار شخصيات قصتي اللي بغيت أوضحه لكم إن أبو ناصر وأبو راشد وأبو مايد بينهم صلة قرابة وهم إخوان من دبي ويسكنون جنب بعض كلهم
أبو حمد جار أبو ناصر ويسكن عدالهم
أبو سعيد يقرب لأهل أم ناصر من بعيد راح تعرفون صلة القرابة من خلال القصة

أتمنى إنكم تتابعون معي القصة وتنتظروا الأحداث اللي راح تصير فيها

((قلبي المشتاق متولع يباك يا وله يا شوق قلبي والعيون))

الجزء الأول

أبكي عليك أبكي عليك من كثر ما أحتاج لك
أبكي عليك أبكي عليك من كثر ما أشتاق لك
أبكيك أنا وقلبي الذي ما يبغي هالدنيا يبيك
رحت وذبل عمري أنا وما ظل غيري والعنا
ما غير أناظر صورتك وأتذكر أيام الهنا
كيف إنت تتركني وتسير وقلبي أنا بحبك أسير
من كثر ما تطري علي ألقاك أنا في كل شي
أصعب على الظالم وأنا حالي مثل ميت وحي
يعني أنا بكل اختصار عايش ولكن روحي فيك


الخميس.. 8:00 صباحا
دبي
في بيت أبو ناصر

قبل الخوض في التفاصيل وصف بسيط لبيت أبو ناصر اللي يشبه بيوت أخوانه أبو راشد وأبو مايد من الخارج والداخل
البيت عبارة عن طابقين الطابق الأول فيه الصالة وميلس للريايل وثاني للحريم .. وفيه غرفة أبوناصر وأم ناصر .. غرفة للبشكارة وغرفة للغسيل وكي الملابس وغرفة للضيوف
أما الطابق الثاني ففيه صالة كبيرة .. قسم لناصر فيه صالة وغرفة وحمام .. وقسم ثاني لشوق وشهد فيه غرفتين بحماماتهم بس الصالة مشتركة وغرفة فاضية إذا حد من أولاد عمهم بات عندهم يخلوه فيها
شوق كانت صاحية على غير عادتها .. يمكن لأن كان الخميس مع إنها أيام المدرسة ما تقوم إلا بطلعة الروح
شوق وهي يالسة ع الشبرية وتكلم نفسها: يا ربي شو هالملل مب عارفة شو أسوي .. أدخل الماسنجر لا شو أدخل الماسنجر ينيت أنا من صباح الله .. إنزين أدخل المنتدى .. لا ويه منتدى شو أحين
شكلي بتخبل ومحد بيدري عني
إلا وتدخل عليها شهد: صباح الخير شوقووو
شوق: صباح النور شهدووو .. شو أصبحتي؟؟
شهد: أصبحت وأصبح الملك لله.. شو قايمة من وقت اليوم مب من عوايدج..(بنظرة غريبة) لشو تخططي؟؟
شوق: هاه .. أنا ما أخطط لشي.. ياحليلي متمللة ومب عارفة شو أسوي قلت أدخل الماسنجر أو المنتدى بس بعدين غيرت رأي
وإنتي ليش قايمة هالحزة؟؟
شهد: ما ياني نوم من صليت قلت خل أقوم أبرك لي
شوق: شهوده حبيبتي طلبتج
شهد: شتبين أنا حاسة إن وراج شي
شوق وهي اطالع وراء: ويه .. شو وراي ماشوف شي؟؟
شهد: شوقووو تستهبلين حضرتج؟؟
شوق: هههههههه فديتج أمزح وياج
شهد: أدري فيج يالله قولي شتبين؟؟
شوق: شهدوو حبيبتي إنتي.. اليوم الخميس خل نطلع وياهم الريم وسارونة وبالمرة نمر على فواغي وحور ومريامي
والله ملل
شهد: شوق شفيج إنتي ثانوية عامة المفروض تركزين ع دراستج بتواحين ع الطلعات
شوق: شهدوو ترا اليوم اجازة يالله عاد حبيبتي شهدووو وافقي
شهد: اوكيه بنطلع بس قبل بنشوف أمايه اذا بتخلينا وبعدين
شوق: جااااااااان استانس.. عيل خل أدق ع البنات وأشوفهم جان بطلعن ويانا
شهد: أنا بروح داري أسبح وبعدين بنزل تحت لا تطولين خل نتريق ويا أمايه وأبويه ونصور
شوق: اوج يالله روحي
وتقوم شوق من ع الشبرية ادز اختها اطلعها لبرع عسب تجري هي اتصالاتها
طلعت شهد من الغرفة وراحت شوق صوب سماعة التلفون
واتصلت أول شي في الريم
شوق: ألو السلام عليكم
محمد: وعليكم السلام
شوق: محمد وياي صح؟؟
محمد: ايه محمد .. إنتي تعرفيني؟؟
شوق: ههههههه محمدووو شفيك أنا شوق بنت عمك
محمد: السموحة شوق ما عرفت صوتج .. شحالج الغالية؟؟
شوق: بخير وعافية شحالك إنت؟؟ وينك محد يشوفك؟؟
محمد: إلا هنيه بس مرتبش في الدراسة شوي وأخبار عمتي وعمي وناصر وشهد
شوق: بخير وعافية .. انزين محمدووو ممكن تعطيني ريماني ؟؟
محمد: لحظة شوي بشوفها لج .. يمكن راقدة؟
راح محمد يشوف الريم دق باب غرفتها ولقاها توها صاحية من النوم
الريم: صباح الخير محمد .. بغيت شي؟؟
محمد: صباح النور .. لا بس شوق بنت عمي ع التلفون أونها تريدج

راحت الريم تكلم شوق
الريم: هلا وغلا والله بشيخة الحريم
شوق: هلا فيج يالغلا شحالج؟؟
الريم: يسرج حالي ولا يضرج .. هاه شو سر هالإتصال ع الصبح أكيد مخططة لشي؟؟
شوق: ليش جيه يعني أنا دوم مكشوفة؟؟
الريم: يعني فيه شي؟
شوق: هيه .. اتصلت اتخبرج إذا بتروحي إنتي وسارة ويانا
الريم بلهفة وهي تقاطع شوق: وين؟؟
شوق: حشى زين خل اكمل بالأول بعدين قولي وين.. أصلا المفروض أنا ما اتصل فيج وبالمرة أوقع ع موافقتج هههههههه
الريم: ههههههه شسوي والله من زمان ما طلعنا صدق ملل
شوق: بصراحة ما حددنا وين بس أنا قلت لشهدوو اليوم نطلع نحن البنات كلنا ويا بعض
الريم: ياااااي ونااااااااسة
شوق: يعني بتروحون ويانا؟؟
الريم:بسأل سارونة وأمي وبرد لج بمسج ع تلفونج
شوق: خلاص عيل انتظر المسج سلمي ع عمي ومرت عمي ورشود وسارونة ومحمدووو
الريم: إن شاء الله وإنتي بعد وصلي السلام
شوق: اوكيه يالله مع السلامة
الريم: مع السلامة
وسكرت شوق عن الريم .. وراحت تاخذ لها حمام عسب تنزل تتريق وبعدين تكمل باقي اتصالاتها
أما الريم فمن سكرت من عند شوق ضربت ع راسها ويلست تكلم نفسها
الريم: يا ربي شكثر أنا غبية .. ما سألت شوقوو ع الساعة كم بنطلع.. بس خل بالأول أخذ الموافقة وبعدين يصير خير..!!
في الصالة كلهم كانوا ع طاولة الطعام يتريقون إلا وشوق يايه صوبهم
شوق: صباح الخير ..شحالك أبويه؟؟ شحالج أمايه؟؟
وتحب راسهم وتقعد عدال شهد
شهد بهمس: شو صار؟؟
شوق: ما صار شي قالت بتسأل سارة وأمها وبترد علي؟؟
شهد: ومريامي ؟؟
شوق: ما اتصلت فيها قلت أنزل اتريق لا تعصب أمايه وبعدين بتصل؟؟
شهد: زين سويتي هي جانت تسأل عنج؟؟
أم ناصر: إنتي وياها شفيجن تتصاصرن .. ما تحشمن أحد
شهد وشوق: هاه .. ولا شي.. السموحة أماية
شهد بدلع: ماماتي
أم ناصر: لبيه
شهد: لبيتي حايه ..يمه اليوم أنا و.. وشوق وبنات عمي بنطلع
أم ناصر: وين بتروحن؟؟
شهد: بنروح مركز صحارى وبندخل السينما وبنتعشى وبنرج
أم ناصر: زين يا بنتي خل أخوج او حد من أولاد عمج يروح وياجن
أبو ناصر: خليهن يروحن يمكن ما ياخذن راحتهن.. وناصر مشغول في الشركة
روحن يا بنتي بس تحملن ع عمارجن تراجن غاليات
شوق : إن شاء الله أبويه .. فديت هالويه أنا ..يعلني ما انحرم منك يا ويه الخير.. واطالع أمها:أقول أمايه
أم ناصر: قولي؟؟
شوق: انتي شرايج تروحي بيتهم عمي خليفة(أبو راشد) بدل لا تيلسين بروحج في البيت
أم ناصر: ما شاء الله البنت تحاتيني
شوق: أفا وليش ما احاتيج مب أمي وتاج راسي
أم ناصر: شتبين ع هالتقردينة؟؟
شوق: ولا شي بس مجرد رأي وإنتي كيفج؟؟
أم ناصر: ما أدري يمكن أروح أو اخليها اهي تيني
شوق: عيل وينه ناصر؟؟
شهد: قبل لا تنزلين بدقايق قام من ع الفطور وراح الشركة عنده قضايا مهمة ويبيلهن جلسة
شوق: خسارة ما شفته كنت أريد أقوله شي
أم ناصر: شهالشي؟؟
شوق: هاه ولا شي
أم ناصر: ما ينرام عليج يا بنت أبوج
شوق: هههههههه
شهد: الحمد لله عساها نعمة دايمة يا رب
الأم والأب وشوق: آمين
شهد: استأذن عنكم بروح داري
شوق: وأنا بعد
الأب والأم: إذنكم معاكم
راحت شوق وشهد كل وحده دارها.. دخلت شوق الدار ودقت ع فواغي عسب تخبرها عن الطلعة واتصلت فيها كانت صاحية من النوم وقتها ولما خبرتها استانست وااايد بس قالت بتستأذن أمها قبل
وبجيه كل البنات بروحن .. بس ينتظروا موافقة حور ومريامي ع الطلعة


يوم الخميس.. 8:00 صباحا
دبي
في بيت أبو مايد

أبو مايد وأم مايد كانوا في الصالة يتقهوا إلا وشوي ينزل عليهم مايد ..
مايد: السلام عليكم .. ويروح يوايه ع أبوه ويحب راسه وبعدين راح صوب أمه وحبها ع راسها
أبو مايد وأم مايد: وعليكم السلام
مايد: ها شو أصبحتوا؟؟
أبومايد وأم مايد: بخير وعافية .. أصبحنا وأصبح الملك لله
أم مايد: شو يا ولدي قايم من وقت اليوم.. مع إنه اليوم الخميس؟؟
مايد: ما ياني نوم قلت أنزل أيلس وياجم شوي إلا جان قطعت عليكم ؟؟
أم مايد: لا والله زين انك ييت تيلس عدنا
أبو مايد: عيل أستأذن بروح الشركة عندي جم شغلة أقضيها وبعدين يمكن اروح صوب العزبة
مايد: أبوي ما تباني أخاويك .؟؟
أبو مايد: شو تاخويني إنت الشركة ما تطلع منها.. اليوم خذلك إجازة وعن أشوف رقعة ويهك في الشركة
مايد: أبوي طردة محترمة هههههههه إن شاء الله ولا يهمك
أبو مايد: يالله عيل مع السلامة
أم مايد ومايد: في حفظ الله
مايد: وشخبار الحلوة اليوم؟؟
أم مايد: والله الحمد لله ع كل حال .. أقول مايد
مايد: هلا
أم مايد: بغيتك تروح بيت أبو راشد وتوصل كم غرض لأم راشد
مايد: ما طلبتي شي الغالية .. احين أوديهم وإلا بعدين؟؟
أم مايد: ما أدري الوقت اللي يناسبك
مايد: عيل خل أوديهن احين لأني فاضي وما وراي شي
أم مايد: بروح اييب لك الأغراض
مايد: وأنا بروح أجهز .. إلا أقول وينها فواغي؟؟
أم مايد: وينها بعد تلاقيها في دارها راقدة
مايد: عيل أروح أغلسبها شوي قبل لا أجهز وإنتي جهزي الأغراض
أم مايد: إن شاء الله
قامت أم مايد وقام مايد عسب يروح لفواغي يغلسبها وبالمرة يتجهز لروحته لبيت عمه
في دار فواغي .. كانت ناشة من الرقاد ومتجهزة وهي تفتح الباب إلا مايد في ويهها
مايد:بل عليج .. احين أنا ياي أغلسبج وأقومج من النوم بطرقي الخاصة وإنتي قايمة؟؟
فواغي: الحمد لله يا ربي وإلا جان اليوم رحت فيها.. والسبب طرق تعذيب النايم اللي تستخدمها
مايد: شو طرق تعذيب.. انزين شحالج انتي؟؟
فواغي: مايد يسألني أنا عن حالي لحظة شوي
وجان تروح عند دريشتها تشوف الشمس أونه من وين طالعة اليوم ومايد مستغرب
مايد: شطالعين إنتي.. سألتج عن حالج ما طلبت بيت شعبي أنا؟؟
فواغي: هاه .. ولا شي بس قلت أشوف الشمس من وين طالعة .. مب من عوايدج تسأل عن حالي.. ههههههه
مايد: بس يالله عن الهذربة خل أروح أتجهز
فواغي بلقافة: وين بتروح؟؟
مايد: مالت عليج ولا أقول وين بروح.. وأنا مساعة اسألج شحالج.. بس إنتي مب ويه سؤال
فواغي: حالي يسرج ولا يضرج يا مايد يا ولد أمي وأبوي يا شيخ الريايل .. يالله عاد قولي وين بتروح أنا اختك الوحيدة اللي مالك غيرها فهالدنيا
مايد: اف منج زين بقولج.. بروح بيتهم راشد
فواغي: والله.. بروح وياك عيل .. بروح أشوف ريماني
مايد: مالي لحشرتج إنتي .. ما شي روحة يالله قعدي مكانج؟؟
فواغي: اووووف زين مب رايحة وياك
مايد: روحي لها العصر .. احين صبح وأنا لو جان أمي ما طلبت مني جان ما رحت.. بس أمي وصتني أوصل لهم أغراض
فواغي: ايه صح تذكرت خلاص ما بروح لها لأني بشوفها بعد صلاة المغرب بروح السنتر وياهم
مايد: اهااا عيل تحملي ع روحج
فواغي: إن شاء الله
مايد:يالله باااااي ماي سستر
فواغي: جود باي ما برذر
وراح مايد يتجهز لأنه بروح بيت أبو راشد يودي لهم الأغراض
أما فواغي فنزلت تحت تتريق وتشوف أمها

يوم الخميس.. 9:00 صباحا
دبي
في بيت أبو راشد

أبو راشد كالعادة جان مسافر وأم راشد في الصالة قاعدة تطالع التلفزيون وياها سارة شوي وتنزل الريم
الريم: صباح الخير .. وتحب راس أمها شحالج أمايه؟؟
أم راشد:صباح النور.. بخير وعافية شحالج إنتي.. شو قاعدة بدري؟؟
الريم: بخير يمة الحمد لله ما أشكي باس .. لا بس شوقووو اتصلت فيني الساعة 8 وقلت أحسن ما أنام .. أخذت حمام ونزلت
أم راشد: شحالها شوق .. احين ما تيي صوبنا.. ليكون مزعلتنها
الريم: انا حشى ما زعلتها .. تعرفيني إنتي أليفة ما أزعل حد ولا أزعل من حد ..
سارة: انزين ما قلتي شتبي منج شوقووو؟؟
الريم: ترا بقولجم احين شتبي.. شوقووو اونها متمللة فقترحت ع شهد نطلع نحن البنات كلنا.. احين أنا ياية اسئلج إذا بتروحين ويايه بعد أخذ راي أمي..
أم راشد: جان تبون تروحون روحوا تراهن بنات عمج مب غرب
سارة: أنا موافقة .. بس أي وقت؟؟
الريم: نسيت اسألها بس قلت بسألج إنتي إذا بتروحي وبالمرة أمي وبعدين أرد عليها واسألها عن الوقت
سارة: خلاص عيل خبريها بعد صلاة المغرب.. وبنتعشى برع
الريم: اوكيه الحين بروح أدز لها مسج
يالله عن اذنكم
راحت الريم عنهم وقعدوا هم يكملوا مطالع التلفزيون
الريم بدارها مسكت تلفونها ورسلت مسج لشوق تقولها فيه
:
"هلا وغلا براعية الأفكار الحلوة.. أمي وافقت وسارونة بتروح ويانا وقالت إن الطلعة لو تكون بعد المغرب أحسن واايد وبالمرة بنتعشى برع.. شرايج..؟؟"

وقعدت تنتظر رد شوق لمن غاصت ف أفكارها في المنتدى اللي هي وشوق وحور مشاركات فيه
وبالأخص لعضو تحسه دوم يراقبها ويحرص إنه يكون متواجد أثناء تواجدها
ما تدري ليش تحس بإحساس الفرح لما تشوفه في المنتدى
إلا ويقطع عليها صوت المسج من عند شوقوو

"جااااااان استانس ع هالمدح.. اوكيه شهد وافقت ع الوقت وقالت بنروح مركز صحارى وبنمر السينما وبعدين بنتعشى.. احين بدق ع فواغي وحور إذا بروحون أو لا .. سلمي"

بعد ما قرت مسج شوقوو نزلت خافت تفكر فهالشخص زود وقالت: خل أروح أخبر سارونة عن مخطط الطلعة أبرك لي
نزلت الريم إلا وجرس البيت يدق

راحت الريم تفتح الباب لأنها كانت نازلة من غرفتها والبشكارة كانت في المطبخ فتحت الباب ولقت مايد
مايد من شاف الريم صخ .. يلس يطالعها .. شوي إلا وردت له حواسه
مايد: السلام عليكم.. هلا بالشيخة؟؟
الريم: وعليكم السلام هلا مايد شحالك؟؟
مايد وهو ينظر للريم بنظرات غريبة: بخير وسهالة شحالج إنتي؟؟
الريم:الحال يسرج ولا يضرج يا ولد عمي
أم راشد: الريم منو ع الباب؟؟
مايد سمع أم راشد لما كانت تنادي الريم .. وإلا هو ما كان عارف من هالبنت لأنه من زمان ما شايف بنات عمه راشد بحكم إنه دوم مشغول وما عرف هي أي وحده فيهم
الريم: هذا مايد ولد عمي
أم راشد: وابوي عليج يا الريم شعنه مخليه الريال واقف دخليه
الريم قفطت: هاه .. ايه تفضل مايد محد غريب
دخل مايد وشاف أم راشد وسارة وسلم عليهم
أم راشد: هلا والله بولدي
مايد: هلا خالتي ..شحالج؟؟
أم راشد: بخير وعافية شحالك إنت وشحال هلج ؟؟
مايد: بخير الحمد لله ما يشكون باس .. شحالج سارة؟؟
سارة: حالي يسرج ولا يضرج .. إنت شحالك؟؟
مايد: بخير وسهالة .. أقول خالتي
أم راشد: هلا ولدي
مايد: أمي موصتني أوصلج هالجم غرض وهي تسلم عليج وااايد وأنا احين استأذن عنكم
أم راشد: لا وين رايح .. اقعد اشرب لك شي
وتصد ع الريم .. ريم رحي يبي لولد عمج شي يشربه
الريم: إن شاء الله أمايه
راحت الريم وعيون مايد عليها .. من أول ما شافها قلبه نغزه وكأنه يعرفها.. شوي وانتبه ع نفسه
مايد: إلا وينهم راشد ومحمد؟؟
أم راشد: والله ما أدري جان طلعوا أحيدهم ف دارهم .. سارة روحي شوفي خوانج خل يسلمون ع ولد عمهم
سارة: إن شاء الله
راحت سارة وفي الوقت نفسه يات الريم ومعها العصير
الريم: تفضل
مايد: يزيد فضلج .. مشكورة
الريم: العفو
حل الصمت إلا والبشكارة تنادي أم راشد عسب تشوف الطبخ
قامت أم راشد وهي تتحرطم ع البشكارة لأنها يديدة وما تعرف للحين شي
وبقى مايد ويا الريم في الصالة
الريم: احم .. أقول مايد
مايد: هلا
الريم: شحالها فواغي.. ما يبتها وياك؟؟
مايد: بخير وعافية .. هي جانت تريد تيي تشوفج بس أنا ما خليتها
الريم: وش عنه ما خليتها .. قالت هالكلام بدون لا تحس .. قفطت
مايد في داخلة ضحكة: لا بس قلت لها تمرج العصر .. لأن هالحزة يمكن تكونين نايمة .. وبعدين قالت إنها بتشوفج بعد صلاة المغرب
الريم: ايه صحيح اليوم بنطلع ويا بعض
إلا وشوي ينزل راشد ومحمد فانسحبت الريم بهدوء
راشد:حيالله من يانا .. وقاموا وتوايهوا
محمد: هلا مايد شحالك..؟؟
مايد : الحمد لله بخير .. شحالكم إنتو.. وينكم ما جأنا أهل ما نشوفجم؟؟
راشد: تدري انت الشركة والأشغال
مايد: إيه والله الشغل يهد الحيل .. وإنت محمد شخبار الدراسة؟؟
محمد: عال العال .. ماكو أحسن عنها
مايد: الله يوفقك إن شاء الله .. عيل برخصتكم
راشد: ما يلسنا وياك .. وين رايح
مايد: بروح وراي أشغال
راشد: جان جيه مرخوص .. خلنا نشوفك عاد
مايد: قريب إن شاء الله .. سلموا ع خالتي
راشد: إن شاء الله
وطلعوا عسب يوصلوا مايد لبرع
طلع مايد من بيت عمه وهو يفكر بالريم .. بس مب لأنها بنت عمه.. أو إنه حبها من شافها.. لا إحساس غريب ماقدر يوصفه لحظتها..!!

يوم الخميس.. الساعة 10:00
دبي
بيت أبو حمد

في بيت أبو حمد الكل كان قاعد في الصالة ماعدا أبو حمد لأنه كان في الشغل
أم حمد: من زمان ما رحت صوب بيتهم أم ناصر .. شرايجن يا بنات تخاوني
حور:ايه أمايه أنا خاطري أشوف شوق من زمان ما شفتها
مريم: حور الكذب خيبة .. مب أمس كنتي وياها في المدرسة والعصر بعد مريتيها
حور: ههههههههه شسوي ولهت عليها هالدبة
حمد كان يالس ويسمع الحديث اللي يدور بينهم.. وخاطره حور تتكلم أكثر عن شوق
مريم: حتى أنا ولهت على شهد مع إني أمس في الكلية شايفتها
أم حمد: عيل خلونا نروح لهم
حور: أمايه مب ألحين عاد .. خليها العصر أحسن
إلا ويصيح تلفون البيت ..
أم حمد: حمد يمه روح شوف من متصل
حمد: حاضر يمه
وكانت المتصلة شوق.. ولأنها متعودة إن حور هي اللي ترد ع التلفون أخذتها بالمرة بشراع وميداف
شوق: حورور يالغبية شعنه ما تردين ع تلفونج .. لكن الشرهة مب عليج ع اللي تدقلج وحارقة تلفونج لكن جان دقيت مرة ثانية ما يصير اسمي شوق .. وما بقولج شو أبي منج لأنج مب ويه طلعات وعزايم
حمد: شحالج شوق؟؟
شوق قفطت وفي خاطرها: ويه هذي مب حور يالفشيلة هذا صوت ريال ليكون حمد.. والله لأوديج في ستين داهية يا حور
ويه نسيت الريال شهالبلشة .. اووووف
شوق: يسرك الحال حمد.. شحالك إنت؟؟
حمد فخاطرة ما بغيتي تردين: بخير وسهالة ..
شوق:السموحة أخوي تحسبتج حور
حمد وهو منقهر ع كلمة أخوي: بالحل الشيخة تبين حور؟؟
شوق: إذا ما عليج أمر
حمد: من عيوني
شوق: تسلم
راح حمد وهو منقهر كان خاطره يطول أكثر في المكالمة
أم حمد: هاه يمه منو ع الخط؟؟
حمد: شوق تبي حور
حور: صج بنت حلال .. قبل شوي ع الطاري.. خل أروح أشوفها شتبي
أم حمد ومريم: سلمي عليها وعلى أهلها
حور: إن شاء الله
حمد: أنا بروح داري أريح شوي .. مريم لو سمحتي قبل الأذان صحيني
مريم: إن شاء الله
راحت حور ورفعت السماعة
حور:ألو حيالله بهالصوت
شوق: الله يحيج .. زين أنسة حور تنزلتي ورديتي ع هالفقيرة اللي صار لها مدة تتصل ع تلفونج وحارقته وماحد يرد وأول ما اتصلت ع تلفون البيت لقفها أخوج
حور: هيه ترا تلفوني بالغرفة ونحن كنا قاعدين بالصالة .. شفيه أخوي شسوى
شوق: ما سوى شي أنا اللي سويت؟؟
حور:شسويتي؟؟
شوق: والله إني مستحية من أخوج بس أنا الغبية.. تحسبيتج كالعادة بتردين ع التلفون.. وجان أزفج زفة محترمة ما بقيت كلمة من خاطري ما قلتها.. إلا وأسمع صوت أخوج يقول شحالج شوق؟؟ جااااااان أصخ
صج سبالة إنتي .. خليتيني فهالموقف ويا أخوج
حور: عادي حمد ما ياخذ لهالأمور.. وبعدين تدرين كنا قبل لا تدقين نسولف عنج
شوق: ليكون تحشون فيني .. خابرتج عدل أنا؟؟
حور: أفا هذا وأنا ربيعتج اللي حاشرة الدنيا في البيت إنتي متولهة عليج
شوق: حورووو يالله عاااد لا تقلبينها تدريني أحبج وأموت عليج
حور: انزين ما قلتيلي ليش حارقة تلفوني ع قولتج؟؟
شوق: اليوم قررنا بعد صلاة المغرب نطلع طلعة بنات بنروح السيتي وبنمر السينما وبعدها بنتعشى وراجعين شرايج
إنتي ومريامي تيون ويانا
حور: جاااااان زين .. بس الأخ حمد ما راح يخلينا
شوق بقهر: وليش يعني؟؟
حور: ما يعيبه نطلع من البيت بروحنا
شوق: صحيح كلنا بنات بس ما راح نتأخر وبعدين ترا نحن نعرف زين ندافع عن نفسنا
حور: أدري إنتي بروحج عن بلد ههههههه
شوق:هههههههه وألحين يعني ماكو أمل
حور بخبث: أكو امل إذا إنتي طلبتي منه هالشي؟؟
شوق: شنو.. ما أسويها قعدي في البيت إنتي واختج
حور: شفيج أمزح ههههههه لهدرجة حمد مسويلج عقدة
شوق: لا بس إنتي تعرفين إني أعتبر أخوج شرات أخوي ناصر وعمري ما فكرت فيه
حور: ايه أدري القلب وين
شوق: هيه يالقلب والله إني متولهة عليه
حور: بس عيب عليج هالحكي شوفي أنا برد لج خبر بعد ما أستشير العائلة الكريمة
شوق: اوج وإذا ما وافقوا .. خليهم يوافقوا
حور: ههههههههه اوج سلمي وايد وترى مريامي وأمي بعد يسلمون عليج
شوق ردي السلام عليهم يالله مع السلامة يالغلا
حور: في حفظ الله
سكرت حور عن شوق وراحت الصالة وكانت تدور على حمد بس ما لقته
حور: عيل وين حمد؟؟
مريم: راح ينام .. تعبان شوي .. شكانت تبي شوق؟؟
حور: أمايه شوق كانت تبينا نروح وياهم بعد صلاة المغرب بيطلعون ويا بنات عمهم
أم حمد: والله لو علي ما عندي مانع .. بس أخوج حمد تدرين فيه ما بخليجن تطلعن بروحجن
حور: ما عليج من حمد خليه علي أهم شي موافقتج
أم حمد: روحوا يا بنتي
حور: وإنتي مريامي تروحين.. ترا شهد رايحة؟؟
مريم: هيه بروح وياكم... بس حمد؟؟
حور: حمد قالج تصحيه قبل الآذان؟؟
مريم: ايوا
حور: لا تصحيه أنا بصحيه
وراحت حور دارها .. فتحت الكمبيوتر وقعدت تشيك ع الإيميل وفتحت ماسنجرها بس لقت كل ربعاتها اوف لاين
حطته في الخارج وراحت ترتب غرفتها لحين موعد الصلاة عسب تروح لحمد توعيه وبالمرة تاخذ الموافقة منه
مر الوقت وع الساعة 12 راحت حور دار حمد دقت الباب ودخلت لقته نايم وجان تمر ع بالها فكرة عبقرية
راحت ويابت كوب ماي وجان تركض صوبه وهي تصرخ: حمد قووووم حرررررريق قوووووووم .. وتصب الماي ع ويهه
حمد من الفزعة : حررررريق وينها؟؟
حور: ههههههههههه هههههههه فويهك
حمد يوم قام من الصدمة: حوروه يالحماره شسويتي إنتي ياللي ما تستحين؟؟؟
حور بخوف: هاه .. ما سويت شي ..
حمد: عيل منو صب الماي علي؟؟
حور: أمزح وياك ترا بس شكلك فظيع هههههههه
حمد: وايد يضحك عنلاتج من بنت .. روحي قبل لا أقطعج احين وما أخلي فيج عظم
حور: ويه بسم الله علي .. ليش عاد ترا السالفة ما ترزأ إلا ماااي
حمد: إلا ماي .. ما عليه إن ما رديتها فيج يالخايسة وبعدين إنتي منو قالج توعيني من النوم .. أنا موصي مريم
حور: إيه صح .. ترا أنا كنت أريد أقولج شي .. فقلتلها أنا بصحيه
حمد: اللهم اجلعه خير.. شتبين .. أدري ما وراج إلا البلاوي
حور: يالله عاد حمد لا تصير صعب خلني أتكلم
حمد: قولي شعندج؟؟
حور: شوق متصلة فينا تبينا أنا ومريامي اليوم نروح معاهم السنتر وبعدين السينما وبعدين نروح نتعشى ونرجع
حمد: لا تحلمن تطلعن من البيت بروحجن
حور: يالله عاد حمد شفيج إنت جيه .. والله شوق بتزعل وهي قالت خبري أخوج وانا بالمرة قلتلها إنك ما بترضى وقالت خليني بكلمه بس إنت كنت نايم فقلتلها أنا بييب لج الموافقة
اضطرت حور تكذب عسب حمد يوافق
حمد وهو سرحان في شوق لما كانت تتكلم
حور: حوووه وين رحت؟؟
حمد: هاه .. وين بروح يعني قدامج قاعد ما تشوفيني
حور: هههه انزين شقلت؟؟
حمد: بتتأخرون..؟؟
حور: ما أدري لأن بنروح السنتر والسينما وبنتعشى يعني قبل 10 بنكون راجعين لا تخاف ما بخليهم يتأخرون
حمد: زين بس لاتيين تقولين تبين تروحين مكان مرة ثانية وبروحكن تحلمي أوافق
حور: شمعنى يوم دخلت شوق في السالفة وافقت
حمد: انجبي يالله طلعي برع مو خذتي اللي تبيه
حور: مشكور حمد حبيبي ما تقصر دوم ياخوي
حمد: العفو
وطلعت حور من غرفة حمد ركض ع غرفتها عسب تخبر شوق
دقت لها وبالمرة ردت عليها
شوق: هلا والله بحوراني
حور: هلا بيج .. شحالج غناتي؟؟
شوق: ما مداني يصير شي فيني قبل شويه مسكره عنج ههههههه
حور: هههههه أدري المهم شتتوقعين حمد قال؟؟
شوق: شقال .. ليكون بس ما وافق؟؟
حور: وافق بس بكذبة بيضاء من حور أم الأفكار
شوق: والله أهم شي وافق .. بس تعالي شقلتي له عسب يوافق؟؟
حور بهمس : والله ورطه
شوق: شقلتي؟؟
حور: هاه .. ولاشي
شوق: زين قولي شقلتيله؟؟
حور: بقول بس لا تعصبين ترا كل هذا عسب نطلع وياكم
شوق: يالله عاد فجيني وقولي
حور: قلتله شوق كانت تريد تستأذن منك بروحها وأنا طلعت أناديك بس شفتك نايم فقلتلها أنا بقولها عنج
شوق: شنو شنو شنو؟ وبأي حق تقولين له إنتي ما تعرفين أخوج احين بصدق عمره.. شيفجني أنا احين هاه؟؟
حور: شوقووو يالله عاااد ما صار شي وحمد إذا تبيني أقوله عن مشاعرك تجاهه ما عندي مانع
شوق: لا والله تريدين تجحليها وبتعميها بزود بعدج .. لا حبيبتي سجتي أبرك لج.. صدق إني بيي احين البيت وبكفخج يالدبة
حور: هههههههه بس عاااااد اهم شي إنه إنتي لج تأثير وبالمرة وافق
شوق: عنلاتج يالخبلة زين عيل تجهزوا بعد المغرب بنمر عليكم
حور: اوج اوج
شوق: اوج بااااااااي
حور:باااااااياااااااااات
سكرت حور السماعة وراحت تبلغ أختها مريم عن الطلعة وموافقة حمد




نهاية الجزء
شو توقعاتكم للجزي الياي

البنات بروحن السنتر؟؟ شراح يصير هناك؟؟
والريم من هالعضو اللي مهتم فيها ودوم يطاردها في المنتدى؟؟
معقولة تحبه أو مجرد اعجاب؟؟
من هو القلب اللي تكلمت عنه شوق ؟؟
وحمد وحبه المفضوح لشوق شراح يصير فيه إذا عرف إنها ما تبيه؟؟
وبقية أبطال القصة اللي ما انذكروا .. شو راح يصير وياهم؟؟


انتظروا الجزء الثاني

((قلبي المشتاق متولع يباك يا وله يا شوق قلبي والعيون))

((قلبي المشتاق متولع يباك يا وله يا شوق قلبي والعيون))


الجزء الثاني

الشاهد الله مانسيتك دقيقه..
حتى بمنامي تزورني بكل الأحلام..
ماهي قصيده هذي والله الحقيقه
مالك خفوقي وهايم بحبك هيــــام..
ودي بشوفه ماتهم الطريقه..
لو يحكموني من بعد شوفك إعدام..
عايش وقلبي تشتعل به حريقه..
واليوم لي يمضي في غيابك شرا العام..
يكفي جفا.. هذا الهجر ما أطيقه..
إرفق بحالي كان في دينك إسلام..
غرقتني بلج البحور الغريقه..
وأنا بزماني كنت شاطر وعوام..
سلبتني بزين الوصوف الرقيقه..
وحسن رهيف يجعل الصاحي ينام..
ذيك اليد الي عمت لك طليقة..
يلعب بها ريح الهبايب والأنسام..
وخد شعي مايوقف بريقه ..
وعيون ترمي من لحظها بالسهام..
عاشق وروحي في ودادك عشيقه..
زار بشرياني وساكن بالعظام..
إرجع دخيلك مغرمك جف ريقه..
مدرك عليه الموت ويعد الأيام..




يوم الخميس .. 7:30 مساءاً
دبي
مركز صحارى

البنات توهن واصلات السنتر وكانوا في سيارتين .. سيارة تسوقها سارة وفيها الريم وفواغي وسيارة ثانية تسوقها شهد وفيها شوق وحور ومريامي
شوق: اوووف ما بغينا نوصل شهالزحمة اليوم
شهد: لا تنسين اليوم الخميس .. شي طبيعي الزحمة
شوق: يا كرهي للزحمة .. عاد لو طلع السنتر زحمة ما بنقعد وااايد
حور: هيه لأنه حمد قالنا لا نتأخر
شوق بغياظ: لا عيل زحمة وإلا مب زحمة أنا أريد أخذ لي أغراض
حور: شلون يعني تريدي تغيضي أخوي
شوق: وأنا شلي بأخوج
شهد: أقول نزلن وعن النجرة الزايدة
وطلعت شهد من السيارة وهن وراها
الريم: شهالحشرة اللي مسوياتنها
مريامي: شوق وحور يتناجرن ع الزحمة
الريم: وليش يتناجرن؟؟
مريامي: شوق ما تحب الزحمة وإذا المركز فيه زحمة بنطلع
فواغي: حشى حشى بعدنا تو واصلين وعادجن تفكرن في الطلعة
الريم: هههههه والله إنجن حالات إنزين خل نشوف بالأول وبعدين طبيعي اليوم تكون زحمة .. ترا اليوم الخميس
مريامي: أقول خليهن هنيه يكملن مناقرتهن وخل نحن ندخل
شهد: وأنا أقول بعد جيه
ومشن رايحات عن شوق وحور
شوق: شو تطالعي خل نروح وياهم لا يودرونا احين بسبتج
حور: ما عليه يا شوقووو بعدين نتفاهم
شوق: ههههه
وراحن يمشن بسرعة عسب يلحقن البنات
داخل السنتر انقسمن البنات قسمين واتفقوا إنهم أول ما يخلصون يدقون لسارة أو شهد
راحن شوق وحور وفواغي والريم ويا بعض
وراحن سارة وشهد ومريامي ويا بعض
شوق: الله خل ندخل نشوف هالإكسسوارات؟؟
الريم: أنا أريد أروح آخذ لي عطر .. شرايجن بدل لا نتأخر كل وحده تدخل المحل اللي تريده
حور: لا ويه وإذا ضعنا .. وبعدين إنتي ما تشوفي السنتر شلون زحمة .. والشباب يطالعونا
فواغي: حور معها حق .. أنا بروح ويا الريم وإنتي حور روحي ويا شوق
حور: أوج مع إني زعلانة عليها
شوق: هههه فديت الزعلانين أنا
الريم: انزين عيل إذا نحن خلصنا قبل بنيكم لا تطلعون من المحل وإذا إنتو خلصتوا مرورا علينا
شوق: أوج أوج

في مكان ثاني في السنتر عند سارة وشهد ومريم
سارة: أقول بنات خل ندخل هالمحل نشوف شعنده؟؟
شهد: يالله نروح
ودخلن المحل يطالعن شفيه
داخل المحل شهد كانت تمشي وعباتها طويلة واايد يعني تسحب في الأرض وهي وتمشي إلا بواحد يدوس ع عباتها فتوقفت وطالعت ع وراء تشوف من هالمحترم
شهد اكتفت بنظرة قاتلة مشت عنه شوي تمشي إلا ويدوس ع عباتها مرة ثانية
تقول في خاطرها : لا عاد طفح الكيل هذا ما ناوي يعديها ع خير
شهد: إنت ما تشوف؟؟
فهد وفي داخلة ميت من الضحك: السموحة الشيخة ما شفتج؟؟
شهد: لا والله ما شفتني .. أول مرة قلنا ما عليه .. لكن ثاني مرة شتسميها هذي؟؟
فهد: الشيخة إنتي عباتج طويلة .. والغلط مب مني ما دامها تسحب
شهد: والله عاد أنا حرة وأسوي اللي يعيبني والغلط منك يا أخ لأنك يوم تمشي ما تطالع زين
فهد: ع العموم أنا آسف الشيخة وحقج علي
شهد مشت عنه ولا عطته ويه وهي تقول صدق وقاااحة
راحت لمريم وسارة
شهد: أقول خل نطلع من هالمحل القرف
مريامي: حوه .. شهوده شصار ليش جيه معصبه؟؟
شهد: ما فيني شي بس خلونا نطلع
سارة: قولي شصار؟؟
شهد: خل نطلع من هالمحل بالأول
وطلعن البنات من المحل وراحن يطالعن باقي المحلات وشهد بعدها معصبة من الموقف المحرج اللي صار لها
أما فهد يوم راحت شهد عنه مات ضحك ع شكلها وقال: صدق حلوة

نرجع عند شوق وحور اللي راحن محل الإكسسوارات
شوق: حوراني شرايج بالخاتم .. حلو مو؟؟
حور: أشوف .. هيه حلو وااايد
شوق: عيل خل ناخذ أربعة منه لي ولج وللريم وفواغي
خلصوا حور وشوق مشترياتهم من محل الإكسسوارات وراحوا للريم وفواغي وهم طالعين مروا شباب اثنين واحد منهم جان لابس دشداشة سودا وشوق أول ما شافته تصنمت.. وصابتها نغزة في قلبهااا.. إحساسها يقول لها إن هالشخص مب غريب عليهاا
كأن كان له وجود في حياتها من قبل
حور: شوق شفيج؟؟ ليش تصنمتي من شفتي الولد؟؟
شوق وهي بعدها في عالمها
حور: شووووووووق أكلمج أناااااااا
شوق: ها .. شتبي؟؟
حور: شفيج من مر الولد تصنمتي؟؟
شوق: ما أدري بس جأني أعرفه
حور: من وين تعرفينه؟؟
شوق: ما أدري أول ما شفته ياني إحساس غريب إني أعرفه.. شي فداخلي يقولي هالإنسان مب غريب علي
حور: ودري هالخرافات وخل نروح للريم وفواغي
وراحن شوق وحور للريم وفواغي بس شوق ردت لها ذكرياتها لمن كانت في العين فما كانت معهم أبدا.. قاعدة تتذكر أيام طفولتها وكأنها تمر قدامها بسرعة البرق.. مب قادرة تنسى سعيد مع إنها حاولت إنها تنساه لأنها تدري إن سعيد مستحيل يكون لها.. هو وين وهي وين .. كانت تقول محال إن القمر والشمس يلتقون .. بس في الوقت نفسه حاولت تغرس هالحب في قلبها وتخليه يكبر يوم عن يوم .. مع إن هالحب هو سبب عذابهااا.. بس في رأيها إن حلاة الحب في عذابه
دخلن محل العطورات ولقن الريم ماخذة عطورات لها ولهن
حور: خلصتوا وإلا بعدكن؟؟
الريم: لا خلصنا
فواغي: إنتو خلصتوا؟؟
حور: هيه خلصنا من وقت
الريم: شوق دقي حق شهد خليهم إيونا هنيه
بس شوق ما سمعتها لأنها للحين ما ردت من أفكارها.. للحين تفكر في سعيد وتفكر في الريال اللي شافته.. تفكر في حالهاا .. معقولة صارت تتخيل كل الرياييل سعيد.. معقولة مع طول الفراق والبعد هالحب مب قادر يخليها تعيش حياتهاااا
الريم: حوه.. شوق أكلمج أنا .. شياج وين رحتي؟؟
شوق بحزن: ها .. ما رحت مكان وين بروح يعني؟؟
الريم: على الريم .. جني ما أدري فيج؟؟ وتطالع حور:شفيها؟؟
حور: ما فيها شي بس الآنسة نحن وظاهرين من محل الإكسسوارات شافت لها واحد غرشوب جان تصخ ولما سألتها قالت أونها تحس إنها تعرفه
الريم: هههههههه هيه يمكن شايفتنه في شي من المسلسلات
شوق: عن الطنازة إنتي وإياها أتكلم جد أنا
فواغي: يمكن ملاقتنه مكان واليوم شفتيه وتذكرتي شكله
شوق: لا ما شايفتنه من قبل بس عندي إحساس يقولي إني أعرفه
حور: أقول يالله عن الهذربة الزايدة إتصلي في شهد خل نروح السينما
شوق طلعت تلفونها وتوها بتتصل إلا وشهد ومريم وسارة يايين صوبهن
سارة: خلصتوا؟؟
حور وفواغي والريم: خلصنا
مريامي: عيل يالله خل ندخل السينما
راحوا صوب السينما والكل كان يسولف ويتفق على الفلم اللي بشوفونه إلا شوق وشهد
سارة: لحظة .. ما تلاحظون شي غريب
مريامي وفواغي والريم وحور: شنو؟؟
سارة: شوق ما أبدت رأيها في الفلم اللي بنطالعه شياها .. ليكون هي بعد صار لها شرات أختها؟؟
فواغي: شنو صار لشهد؟؟
سارة: ما رضت تقولنا بس كنا في محل الملابس إلا شوي تيينا معصبة وتقولنا خل نطلع من هالمحل القرف هههههههه
شهد: بس يالله عنلاتج لازم تذكرين السالفة يعني .. شوقووو شفيج؟؟
شوق: ولا شي شفيني يعني؟؟
شهد: ما قلتي رأيج
شوق: بشنو؟؟
شهد: الفلم اللي بنطالعه
شوق: عادي أي فلم .. ما تفرق عندي
سارة: عيل خلونا نتابع هالفلم
قعدن البنات في ستاربكس لحد ما يبدأ عرض الفلم وبعد ما تابعوا الفلم ..راحوا يتعشوا وبعدها رجعوا البيت


يوم الخميس .. 8:00 مساءا
العين
بيت أبو سعيد

روضة كانت تدرس في دارها ودخل عليها أبوها
أبو سعيد: هلا بنتي روضة شحالج؟؟
روضة: بخير وعافية .. شحالك إنت؟؟
أبو سعيد: الحمد لله يا بنتي .. عيل وينه سعيد؟؟
روضة: سعيد قال بروح دبي يشوف أمي
أبو سعيد: عيل ليش ما رحتي وياه؟
روضة: وراي دراسة وهو رايح ويا ربعه وقلت الأسبوع الياي بروح وبشوفها
أبو سعيد: الله يوفقج يا بنتي
وطلع أبو سعيد من دار روضة.. أما روضة ففكرت تروح تشوف يدتها اللي هي أم أمها وخالاتها لأنهم يسكنوا عدالهم
وفعلا تجهزت وراحت لهم
روضة: السلام عليكم .. هلا يدوه شحالج؟؟
اليدة:وعليكم السلام.. بخير وعافية .. هلا برواضي .. شحالج حبيبتي؟؟
روضة: يسرج الحال ولا يضرج يالغالية.. عيل وينها خالووو نورة؟؟
اليدة: والله ما أدري يمكن في دارها.. وينه سعيد ما شوفه وياج؟؟
روضة: سعيد راح دبي يشوف أميه ويتمشى ويا ربعه
اليدة: وشعنه ما رحتي وياه؟؟
روضة: ترا هو راح ويا ربعه وأنا جان وراي دراسة فقلت أخليها للأسبوع الياي
اليدة: اهاااا .. وما قالج متى بيرجع؟؟
روضة: ما أدري فيه والله بس أكيد راح يتصل يخبرني إذا ببات في دبي أو بيرجع
اليدة: زين شوفيه إنتي؟؟
روضة: إن شاء الله .. ومسكت تلفونها تتصل فيه
روضة: ألو هلا بالشيخ .. شحالك؟؟
سعيد: هلا والله برواضي.. بخير.. شحالج إنتي؟؟
روضة: بخير وعافية .. أقول سعودي؟؟
سعيد: لا فديتني عيناوي
روضة: ههههههه
سعيد: إنزين قولي شتبين؟؟
روضة: يدوه تسأل بتيي اليوم العين وإلا بتبات؟؟
سعيد: بيي إن شاء الله تو طالعين من السنتر وبالمرة راجعين
روضة: وأمي شفتها؟؟
سعيد: هيه وهي زعلانة عليج ليش إنج ما ييتي لها؟؟
روضة: شسوي إنت رايح ويا ربعك .. ما عليه يوم برجع البيت بتصل فيها
سعيد: وإنتي وين احين.. شعنه طالعة من البيت؟؟
روضة: طاع هذا .. وأنا شو أقولك من ساعة .. يدوه هي اللي تسأل يعني أنا احين عندها
سعيد: فديتها والله سلمي عليها وااايد
روضة: يبلغ إن شاء الله .. اهتم بروحك
سعيد: لا توصي .. يالله مع السلامة
روضة: في حفظ الله
وسكرت روضة الخط من عند سعيد وقالت لها إنه اليوم بيي العين وإنه يسلم عليها .. وطلعت تسلم ع خالتها نورة عسب تروح البيت وتتصل في أمها

يوم الخميس .. 10:30
دبي
بيت أبو ناصر

شوق كانت في غرفتها قاعدة وتفكر بالشخص اللي شافته اليوم.. ليش صخت أول ما شافته كأن قلبها يقولها إنها تعرف هالشخص شوي وتدخل عليها شهد
شهد: شوقووو .. شوقوووو
شوق: هلا شهد .. من متى إنتي هنيه؟؟
شهد: قبل شوي.. فشنو سرحانة؟؟
شوق: شهد تدرين شصار اليوم
شهد: شصار؟؟
شوق: لو ما كذب إحساسي وقلبي.. اليوم شفت سعيد
شهد: وين؟؟
شوق:كنت أنا وحور طالعين من محل الإكسسوارات
شهد:وشو سويتي؟؟
شوق: من شفته صخيت ما أدري شو ياني وقعدت أطالعه لحد ما اختفى
شهد: بس إنتي عمرج ما شفتي سعيد من كبرتي؟؟
شوق: أدري بس إحساسي يقول إن هو
شهد: عيل ليش هو ما قاله إحساسه هالشي؟؟
شوق: ما أدري يمكن ما شافني أو شي
شهد: يمكن .. أقول شرايج نقترح ع أمي نروح العين نشوف أهلنا هناك
شوق: والله .. جان زين .. خاطري أروح أشوفهم تولهت عليهم وااايد
شهد: خلي الموضوع علي
شوق: مشكورة فديتج.. انزين أقول إنتي ليش عصبتي اليوم في السنتر؟؟
شهد: ههههههههه لا تذكريني بالموقف البايخ اللي صار لي
شوق: قولي عاد بلا دلع شصار فيج؟؟
شهد: واحد غبي داس عباتي من ورا وما قلت له شي.. مشيت شوي إلا ويدوسها مرة ثانية جان أقوم له
شوق: ههههههههه شقلتي له؟؟
شهد: ما أتذكر شقلت حزتها لأني كنت محرجة عليه.. بس هو قال السموحة الشيخة ما شفتج والغلط مب مني منج عباتج طويلة وتسحب.. وأنا أسف جان أمشي عنه وما رديت عليه
شوق: هههههههه يا حليلج يا شهوده
شهد: ضحكي شعليج مب إنتي اللي مقفطينها ودايسين عباتها
شوق: ههههههه صراحة موقف لا تحسدين عليه
شهد: زين عيل أنا بروح أشوف الماسنجر إذا سارونة أون لاين وبعدين بروح أنام وباجر بفاتح أمي في موضوع روحتنا للعين
شوق: اوج يالغلا
شهد: تصبحين ع خير
شوق: تلقين كل خير
وراحت شهد دارها أما شوق فقعدت تفكر بروحة العين وهل بتشوف سعيد أو لا وبعدها قررت تدش النت فتحت المنتدى اللي مشارجين فيه ودخلت الماسنجر ولقت حور والريم أون لاين جان تضغط على حور وعملت دعوة للريم وصارن الثلاث في محادثة وحدة

قلبي المشتاق متولع يباك(شوق): هلا وغلا بالغاليات شحالجن؟؟

لو تعرف في قلبي غلاك بتعذر حنيني(حور): هلا والله بخير وعافية.. شحالج؟؟

اللي مثلي لو تدلع الدلع لايق عليه واللي مثلك لو تولع اللي مثلي وش عليه(الريم): هلا ومليار غلا .. يسرج الحال .. شحالج إنتي؟؟

قلبي المشتاق متولع يباك: بخير وعافية .. قبل ساعة مودرتنجن ههههههه

لو تعرف في قلبي غلاك بتعذر حنيني:هههههههه شنسوي ولهنا عليج يالدبة

اللي مثلي لو تدلع الدلع لايق عليه واللي مثلك لو تولع اللي مثلي وش عليه: أونه ولهنا عليها ههههههه.. أقول بنات شوفولي صرفة مع هالعضو دومه يلاحقني


قلبي المشتاق متولع يباك:أي عضو؟؟

لو تعرف في قلبي غلاك بتعذر حنيني: الريم من ورانا.. من م الأعضاء؟؟؟

اللي مثلي لو تدلع الدلع لايق عليه واللي مثلك لو تولع اللي مثلي وش عليه: حشى لا من وراجن ولا شي .. أنا ملاحظة عليه من فترة بس ما تكلمت في الموضوع لأنه ما سوا شي.. كل اللي يسويه يقعد في ملفي الشخصي وأحيانا أي منتدى أنا أدخله هو يدخله ..انزين إنتن في المنتدى ..؟؟

لو تعرف في قلبي غلاك بتعذر حنيني: أنا لا ما دشيت بدش احين

قلبي المشتاق متولع يباك:أنا في المنتدى.. يالله قولي من هالعضو؟؟

اللي مثلي لو تدلع الدلع لايق عليه واللي مثلك لو تولع اللي مثلي وش عليه: عضو اسمه الملهم

قلبي المشتاق متولع يباك: هيه شفته .. أقول شتبي فيه خليه.. يراقبج في الأخير بمل وبتركج

لو تعرف في قلبي غلاك بتعذر حنيني: انزين ريمووو إذا رسل لج رسالة شراح يكون موقفج؟؟

اللي مثلي لو تدلع الدلع لايق عليه واللي مثلك لو تولع اللي مثلي وش عليه: ما أدري.. قولولي إنتو شو أسوي؟؟


قلبي المشتاق متولع يباك: ريموو هذا إداري في المنتدى

اللي مثلي لو تدلع الدلع لايق عليه واللي مثلك لو تولع اللي مثلي وش عليه:أدري .. بس شو يبا مني؟؟


لو تعرف في قلبي غلاك بتعذر حنيني: يمكن معجب فيج؟؟ أو في أسلوبج؟؟

اللي مثلي لو تدلع الدلع لايق عليه واللي مثلك لو تولع اللي مثلي وش عليه: ولو .. هو إداري وهذا ما يعطيه الحق يسوي جيه

لو تعرف في قلبي غلاك بتعذر حنيني: أقول أنا رايحة أرقد .. تعبانة وااايد .. وباجر نشوفلج حل ويا روميوووو هههههههه

اللي مثلي لو تدلع الدلع لايق عليه واللي مثلك لو تولع اللي مثلي وش عليه: مالت عليج .. صج ما منج فايدة .. أوكي نشوفج باجر


قلبي المشتاق متولع يباك:حورووو سلمي ع مريااامي وتصبحين ع خير حبيبتي.. أشوفج باجر

لو تعرف في قلبي غلاك بتعذر حنيني: تلقون كل الخير.. مع السلامة

اللي مثلي لو تدلع الدلع لايق عليه واللي مثلك لو تولع اللي مثلي وش عليه: في حفظ الله

قلبي المشتاق متولع يباك:في حفظ الله .. إنزين ريمووو ما قلتيلي إنتي شرايج فيه؟؟

اللي مثلي لو تدلع الدلع لايق عليه واللي مثلك لو تولع اللي مثلي وش عليه: شدراني .. أحيانا ياخذ مساحة من تفكيري .. بس أحياناً أقول شهالخرابيط أكيد يلعب..

قلبي المشتاق متولع يباك: إذا رسل لج رسالة .. يقول فيها إنه معجب أو جيه .. طنشيه لا تسوين له سالفة

اللي مثلي لو تدلع الدلع لايق عليه واللي مثلك لو تولع اللي مثلي وش عليه: أوكيه .. تدرين فيني خوافة ما راح أسوي شي


قلبي المشتاق متولع يباك: عيل أنا استأذن عنج بعد .. وباجر بنشوف لنا حل مع هالملهم


اللي مثلي لو تدلع الدلع لايق عليه واللي مثلك لو تولع اللي مثلي وش عليه: أوكيه أنا بعد بطلع .. بس تدرين شي .. اسمه حلو ههههههه

قلبي المشتاق متولع يباك: هذي بداية الطيحة يا ريموووهههههه يالله قلبي ويهج خل أروح أنام


اللي مثلي لو تدلع الدلع لايق عليه واللي مثلك لو تولع اللي مثلي وش عليه: إن شاء الله بس ما قلتيلي على أي صفحة ههههههههه

قلبي المشتاق متولع يباك: الصفحة الأخيرة ههههه يالله تصبحين على خير

اللي مثلي لو تدلع الدلع لايق عليه واللي مثلك لو تولع اللي مثلي وش عليه: وياج .. مع السلامة


قلبي المشتاق متولع يباك: مع السلامة

وطلعت شوق من المنتدى والماسنجر وراحت ع الشبرية تفكر في اللي أخذ عقلها وقلبها لحد ما خذتها النومة ونامت

أما شهد فبعد ما طلعت من عند شوق فتحت ماسنجرها وكانت سارة أون لاين وفيه شخص ثاني بعد أون لاين
شهد كلمت سارة شوي ع الماسنجر بس ما طولت معها لأنها كانت متلهفة تكلم الشخص الثاني فسكرت من عند سارة وضغطت ع الشخص
وش حيلة اللي هام في حب مخلوق فرقاه موت وكسبه استحاله(شهد): السلام عليكم

عيني شقاها هواها: وعليكم السلام
وش حيلة اللي هام في حب مخلوق فرقاه موت وكسبه استحاله: شحالك خالد؟؟

عيني شقاها هواها: تمام الحمد لله .. شحالج إنتي؟؟

وش حيلة اللي هام في حب مخلوق فرقاه موت وكسبه استحاله: بخير وعافية

عيني شقاها هواها: اليوم ما داشة النت من وقت؟؟


وش حيلة اللي هام في حب مخلوق فرقاه موت وكسبه استحاله: ترا ما كنت في البيت .. اليوم رحنا السنتر مرينا السينما وبعدها تعشينا ورجعنا وما كنت بدش بس قلت لازم أقولك تصبح على خير

عيني شقاها هواها: منو رايح وياج؟؟


وش حيلة اللي هام في حب مخلوق فرقاه موت وكسبه استحاله: أختي وبنات عمي ورفيجتي وأختها

عيني شقاها هواها: اهاااا .. إن شاء الله استانستي؟؟

وش حيلة اللي هام في حب مخلوق فرقاه موت وكسبه استحاله: وااااايد .. بس صاار لي موقف زفت في السنتر


عيني شقاها هواها: شو صار؟؟

وش حيلة اللي هام في حب مخلوق فرقاه موت وكسبه استحاله: كنت أمشي وما أحس إلا واحد يدوس عباتي سكتت عنه ومشيت إلا شوي ويدوسها مرة ثانية.. وجااان أعصب وهزبته

عيني شقاها هواها: ههههههههه يا حليلج يا شهد

وش حيلة اللي هام في حب مخلوق فرقاه موت وكسبه استحاله: عنلاتك يالهرم لا تضحك علي .. والله إني شوي وبذبحه بس تركته

عيني شقاها هواها: اوكيه ما راح أضحك بس لا تعصبين .. إنزين أقولج شي؟؟


وش حيلة اللي هام في حب مخلوق فرقاه موت وكسبه استحاله: قول شتبي؟؟

عيني شقاها هواها: تولهت عليج واااااايد

وش حيلة اللي هام في حب مخلوق فرقاه موت وكسبه استحاله: أدري ما قلت شي يديد هههههههه حتى أنا تولهت عليك

عيني شقاها هواها: ما قلتيلي شخبار الكلية؟؟


وش حيلة اللي هام في حب مخلوق فرقاه موت وكسبه استحاله:
الكلية عال العال وكل الأمور ماشية تمام

عيني شقاها هواها: ما اوصيج اهتمي في دراستج عدل ما أرضى بأقل عن الإمتياز

وش حيلة اللي هام في حب مخلوق فرقاه موت وكسبه استحاله:
إن شاء الله ولا يهمك عسب خاطرك بس بشد حيلي وبييب الإمتياز إن شاء الله

عيني شقاها هواها: تسلمي الغالية

وش حيلة اللي هام في حب مخلوق فرقاه موت وكسبه استحاله:
انزين خلودي بطلع عنك أنا احين .. تعبانة شوي بروح أنام


عيني شقاها هواها: زين حبيبتي .. روحي ارتاحي ونامي ولاتنسي تتغطي زين


وش حيلة اللي هام في حب مخلوق فرقاه موت وكسبه استحاله:
تصبح على خير ومع السلامة

عيني شقاها هواها: وإنتي من أهله .. مع السلامة

سكرت شهد من عند خالد وكالعادة ضميرها يبدأ يأنبها لأنها تكلم هالشخص بدون علم أهلها بالرغم من إنها تحبه ويحبها وبعد تفكير طويل راحت في سابع نومه



يوم الخميس .. 10:30 مساءاً
دبي
بيت أبو مايد

كان مايد في غرفته يالس ع الكمبيوتر.. داش النت إلا وحد يضرب الباب

مايد: تفضل
فواغي: الحلو صاحي؟؟
مايد: هيه صاحي .. وملاااان قال أحسن يدش النت
فواغي: ويه ميود يدش النت
مايد بعصبية: أصغر عيالج تقولين لي ميود
فواغي:بل .. بل أسحبها .. الشيخ مااايد يدش النت؟؟
مايد: وليش ما يدش النت.. وإلا بس حق البنات؟؟
فواغي: لا والله للشباب والبنات بس ما كنت متوقعة إنك على إنشغالك تدش النت؟؟
مايد: ترا أحيانا في الشركة ماكو شغل فأدش
فواغي: وشو تسوي؟؟
مايد: مشارك في المنتدى وأنا إداري فيه؟؟
فواغي: قول والله
مايد: أكذب يعني .. تعالي شوفي
وشافت فواغي إسم مايد المستعار وتأكدت فعلاً إنه هو إداري
فواغي: هالمنتدى ما غريب عليّ
مايد: كيف يعني.. مشاركة فيه؟؟
فواغي: لا ويه.. ما أحب المنتديات أنا؟؟
مايد: عيل وين شايفته؟؟
فواغي وهي تحاول تتذكر: ايه تذكرت هالمنتدى مشاركات فيه بنات عمي شوق والريم
مايد من سمع الريم بغى يوقف قلبه
مايد بخبث: ما تعرفين شنو أسماءهن في المنتدى؟؟
فواغي: لا والله ما أدري.. بس إنت إسمك حلووووو
مايد: لازم حلو .. مب أنا اللي مختاره .. شراتي مو؟؟
فواغي: ويه بدت الخقة .. أروح أنا أبرك لي
مايد: وأنا أقول جيه بعد .. روحي نامي أبرك لج
فواغي: يالله تصبح ع خير يالملهم ههههه
مايد: فواغي إياني وإياج وحده من بنات عمي تعرف إسمي أو إني مشارك في المنتدى
فواغي: إن شاء الله ولا يهمك
مايد: وإنتي من أهل الخير

طلعت فواغي عن مااايد .. وهو سكر المنتدى وقعد يفكر في العضوة اللي من يوم شاركت في المنتدى ما خلاها في حالها.. وفجأة يات ع باله الريم
وقعد يتذكر شكلها لحد ما رقد

يوم الخميس.. 11:00
دبي
بيت أبو راشد

في بيت أبو راشد الكل كان ناااايم إلا سارة كانت تطالع التلفزيون شوي ويدخل راشد اللي ياي من برع

راشد: السلام عليكم
سارة: وعليكم السلام
راشد: هلا سارة شحالك.. سهرانة؟؟
سارة: بخير وعافية.. هيه والله ما ياني نووم .. كنت قاعدة أكلم شهد ع الماسنجر وبعدين سكرت عنها وقلت أيي أطالع التلفزيون
راشد: شلونها شهد؟؟
سارة: بخير وعافية .. اليوم كنا ويا بعض طالعين
راشد: وين رحتو؟؟
سارة: رحنا مركز صحارى سوينا shopping ودخلنا السينما .. وتعشينا ورجعنا
راشد: أهااا .. أقول سارة أريد أكلمج في موضوع
سارة: خير إن شاء الله
راشد: كل الخير .. بس قبل كل شي الكلام اللي بقوله لج ما أريده يطلع من بينا.. يعني محد يعرف عنه
سارة: أوعدك محد راح يعرف بس إنت قول خوفتني؟؟
راشد: وليش تخافين .. الموضوع ما يخوف
سارة: زين يالله قول


نهاية الجزء
توقعاتكم للجزء الياي

أم شوق بتوافق ع روحة العين؟؟

شوق .. شو سر الإحساس اللي ياها أول ما شافت الريال؟؟
وشنو ذكرياتها في العين .. وسعيد له علاقة بهالذكريات؟؟

شهد .. كيف تعرفت على خالد ..؟؟ راح يظلوا ع هالحال وإلا راح تتطور علاقتهم؟؟

الريم .. بتعرف منو هالعضو اللي يلاحقها؟؟

مايد.. معقولة يحب هالعضوة وإلا بس يلعب؟؟

فواغي بتخبر شوق والريم وحور عن مايد؟؟

وراشد .. شنو الموضوع اللي يريد يكلم سارة فيه؟؟؟
وبقية أبطال القصة شراح يصير فيهم

إنتظروا الجزء الثالث من

((قلبي المشتاق متولع يباك يا وله يا شوق قلبي والعيون))